काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजना र एसियाली ऋण महासंघ (अकू) को प्राविधिक सहकार्यमा साकोसहरुमा सञ्चालित गुणस्तर सुनिश्चिता कार्यक्रम एक्सेसमा आवद्ध एवं ब्राण्डेड संस्थाहरुबीच छलफल एवं अनुभव सिकाई आदानप्रदान कार्यक्रम आज अभौतिक रुपमा सम्पन्न भएको छ । 

नेफ्स्कूनका उपाध्यक्ष एवं सदस्य सेवा व्यवस्थापन उपसमिति संयोजक शान्ती अधिकारीको संयोजनमा सम्पन्न कार्यशालामा २४ वटा संस्थाहरुबाट ४२ जना प्रतिनिधिहरुको सहभागिता रहेको थियो । एसियाली ऋण महासंघकी प्रमुख कार्यकारी अधिकृत इलेनिता सान्रोके र अकूका चिफ टेक्निकल एड्भाइजर रञ्जित हिताराचिले सदस्यहरुको बचतको सुरक्षाका लागि संस्थाको खराव ऋण व्यवस्थापन गर्दे ओभरकम योजना बनाएर संस्थाको वित्तीय अवस्थामा सुधार ल्याउने, सदस्य सेवाका कार्यक्रमहरुलाई निरन्तरता दिनको लागि अनुरोध गर्नुभएको थियो । 

कार्यक्रमको उद्घाटन गर्दै नेफ्स्कून उपाध्यक्ष शान्ती अधिकारीले यस पहिलेको समिक्षा अभौतिक बैठकमा अकू मार्फत साकोस एवं नेफ्स्कूनलाई दिईएका सुझावहरुको कार्यान्वयको अवस्थाका बारेमा र नेफ्स्कूनले अहिले नेपालको साकोस अभियानको विषयमा गरिरहेको कार्य र हाल समस्याको रुपमा रहेको सन्दर्भ व्याजदर परिर्वतनका लागि राज्यसंगको लविङको अवस्थाका बारेमा जानकारी गराउनुभएको थियो ।  

कार्यक्रममा सदस्य सेवा विभाग प्रमुख गणेश प्रसाद तिमिल्सिना साथै बरिष्ठ अधिकृत तथा अधिकृतहरुको सहभागिता रहेको थियो । कार्यक्रमको सहजिकरण नेफ्स्कूनका बरिष्ठ कार्यक्रम अधिकृत प्रेमनाथ वाग्लेले गर्नुभएको थियो ।