क्यानबेराको भ्यानकुभरमा आयोजित विश्व क्रेडिट युनियन सम्मेलन– २०२३ मा विभिन्न किर्तिमान कायम भएका छन् । बचत तथा ऋण सहकारीहरुको विश्वस्तरीय छाता संघ विश्व ऋण परिषद् (ओकू) ले करिब एक दशकपछि उत्तर अमेरिकी मुलुक क्यानाडामा आयोजित ४ दिने सम्मेलनमा थुप्रै किर्तिमानहरु तोडिएको दाबी गरेको छ ।

भ्यानकूभर कन्भेन्सन सेन्टरमा यही जुलाई २३ देखि २६ सम्म आयोजित सम्मेलनमा यो पटक ६० सदस्य राष्ट्रका ३ हजार बढी सहभागी भएका थिए । सहभागिताका दृष्टिले यो आफैमा अहिलेसम्मकै किर्तिमान हो । यसैगरी, सम्मेलनका क्रममा करिब १ सय वक्ताहरु रहेका थिए भने मुख्य विषयवस्तु र ब्रेक आउट सेसन गरी ४० वटा प्रस्तुति गरिएको थियो । सम्मेलनमा वक्ता र विषयवस्तुको संख्या दुबै किर्तिमान भएको ओकूले जनाएको छ । त्यस्तै, कार्यक्रम आयोजना स्थलमा स्टलहरु भाडामा लिएर आफ्नो व्यवसाय प्रवर्धन गर्ने बिक्रेताहरुको पनि कीर्तिमानी सहभागिता रह्यो । ओकूले अमेरिकाबाहिर आयोजना गरेका कार्यक्रमहरुमध्ये यो पटक सबैभन्दा बढी बिक्रेताहरुको साथ पाएको उल्लेख गरेको छ । 

अर्को महत्वपूर्ण विषय भनेको उक्त सम्मेलन सामाजिक सञ्जालमा पनि लोकप्रिय भएको छ । सम्मेलनका समाचार र गतिविधिहरु सामाजिक सञ्जालमा अत्यधिक सेयर गरिएका छन् । सामाजिक सञ्जालहरु फेसबुक, इन्स्टाग्राम, ट्वीटर र लिङ्कदिनमा गरी ओकूको ह्यासट्याग #wcuc2023,सम्मेलन समापन भएको भोलिपल्ट २ हजार पटक सेयर भएका थिए । उक्त सम्मेलनमा नेपालबाट नेफ्स्कून तथा राष्ट्रिय सहकारी बैंकको सहभागिता रहेको थियो । ओकूले अर्को वर्ष अर्थात् सन् २०२४ को विश्व क्रेडिट युनियन सम्मेलन अमेरिकाको बोस्टनमा आयोजना हुने जनाएको छ । अमेरिकी बचत तथा ऋण सहकारीहरुको केन्द्रीय संघ क्यूनासँगको सहकार्यमा उक्त सम्मेलन जुलाई २१ देखि २४ सम्म आयोजना गरिने ओकूले उल्लेख गरेको छ ।