अन्तर्राष्ट्रिय सहकारी महासंघ–आईसीएको एसिया प्रशान्त क्षेत्रीय कार्यालय आईसीए एपीको १६औं साधारण सभा फिलिपिन्सको राजधानी मनिलामा आउँदो नोभेम्बर महिनामा आयोजना हुँदैछ । प्रत्येक दुई वर्षमा आयोजना हुने साधारण सभा आईसीए एपीको सर्वोच्च निकाय हो । नोभेम्बर ६ देखि १० सम्म आयोजना हुने सभाले आईसीएको क्षेत्रीय निकायको विगत दुई वर्षका कार्यक्रमहरुको समिक्षा गर्नुका साथै भावी नीति तथा कार्यक्रमसहित कार्यदिशा तय गर्ने छ । सभामा सहकारी क्षेत्र र त्यसमा पनि एशिया प्रशान्त क्षेत्रकाका समसामयिक विषयहरुमा पनि छलफल हुने बताइएको छ । 

सन् २००३ यता फिलिपिन्सको सहकारी अभियानले पहिलो पटक आईसीए एपीको साधारण सभा आयोजना गर्न लागेको हो । सभाको सेरोफेरोमा नोभेम्बर ८ मा ‘कोअपरेटिभ्स: आवर कमन एजेन्डा’ थिममा सहकारीः ११औं एशिया प्यासिफिक कोअपरेटिभ फोरम पनि आयोजना हुँदैछ भने आईसीए एपीको सञ्चालक समितिको बैठक पनि मनिलामै बस्ने कार्यक्रम रहेको छ । नोभेम्बर ८ मा आईसीए एपीले पहिलो पटक सुरुवात गरेको आईसीए एपी कोअपरेटिभ एक्सिलेन्स अर्वाड पनि घोषणा गरिदैछ । सहकारी क्षेत्रमा उत्कृष्ट कार्य गर्ने व्यक्ति, संस्था र नियामक निकाय गरी ३ विधामा यो पुरस्कार दिइने आईसीए एपीले जनाएको छ ।

विश्व सहकारी अभियानको सर्वोच्च निकाय आईसीए अन्तर्गत हाल आईसीए एपी, आईसीए अफ्रिका, आईसीए युरोप र आईसीए अमेरिकाज् गरी ४ वटा क्षेत्रीय कार्यालय रहेका छन् । सन् १९६० मा स्थापना भएको आईसीए एपीको मुख्यालय भारतको राजधानी नयाँ दिल्लीमा अवस्थित छ भने पहिलो क्षेत्रीय साधारण सभा सन् १९९५ मा नयाँ दिल्लीमानै आयोजना गरिएको थियो । आईसीए एपी अन्तर्गत हाल २८ राष्ट्रका करिब १ सय ८ सहकारी सदस्य रहेका छन् । आइसीए एपीको अध्यक्षमा भारतका प्रसिद्ध सहकारीकर्मी डा.चन्द्रपाल सिंह निर्वाचित भएपछि पहिलो पटक साधारण सभा आयोजना हुन लागेको हो । सभामा आईसीएका अध्यक्ष एरियल ग्वार्को लगायत सदस्य सहकारीका प्रतिनिधिहरुको सहभागिता रहनेछ । नेपालका बचत ऋण सहकारीहरुको एक मात्र विषयगत केन्द्रीय संघ नेपाल बचत तथा ऋण केन्द्रीय सहकारी संघ लि. (नेफ्स्कून) पनि आइसीए एपीको सदस्य रहेको छ ।