अन्तर्राष्ट्रिय सहकारी महासंघ–आईसीएले इजरायल प्यालेस्टाइन क्षेत्रमा शान्तिका लागि आग्रह गरेको छ । पछिल्लो समय दुबै पक्षबीच हिंसात्मक गतिविधि बढेको भन्दै आईसीएले शान्तिका लागि द्वन्दरत पक्षसँग आग्रह गरेको हो । विश्व सहकारीको सर्वोच्च निकायले एक विज्ञप्ति जारी गर्दै दुबै पक्षका युद्ध पीडितहरु तथा ती क्षेत्रमा रहेका सहकारीका सदस्यहरुप्रति ऐक्यबद्धता रहेको जनाएको हो । 

विज्ञप्तिमा युद्धका क्रममा सर्वसाधारण नागरिकलाई बन्दी बनाइएको तथा उनीहरुमा माथि दुबै पक्षबाट भएका आक्रमणको भत्सर्नासमेत गरिएको छ । आईसीएले युद्धविराम तथा समस्याको दीर्घकालिन समाधानका लागि गरिएका कुटनीतिक प्रयासमा साथ र समर्थनका लागि समेत अन्तर्राष्ट्रिय समुदायसँग आग्रह गरेको छ । साथै उसले मानवअधिकारको सम्मान गर्न सबैलाई आग्रह गरेको छ । आईसीएले मध्यपूर्वमा जारी युद्धको शान्तिपूर्ण अवतरणका लागि सम्बन्धित पक्षसँगै अन्तर्राष्ट्रिय समुदायको ध्यानाकर्षण गराएको हो । आईसीले विज्ञप्तिमा भनेको छ, ‘विवादको समाधान कदापि हिंसाको माध्यमाबाट हुन सक्दैन ।’ विश्व शान्ति, मानवअधिकार, सामाजिक न्याय र भाइचारामा विश्वास गर्ने आईसीएले सहकारीकामाध्यबाट सकारात्मक शान्ति सम्बन्धी घोषणापत्र समेत  जारी गरिसकेको छ । 

यसैबीच, आईसीएले इजरायल तथा प्यालेस्टाइनका द्धन्दपीडितहरुलाई खुला ह्दयका साथ नगद जिन्सी लगायत हरतरहका सहयोग गर्न सबै मुलुकका सहकारी अभियानलाई आग्रहसमेत गरेको छ ।