एजेन्सी । पछिल्लो तथ्याङ्क अनुसार १ करोड १५ लाख बेलायती (वयस्क) हरुसँग १ सय डलर भन्दा न्यून बचत छ । ९० लाख बेलायतीहरुलाई आधारभूत खाद्य सामाग्री किन्न तथा अत्यावश्यक बिल भुक्तानी गर्न ऋण लिनुपर्ने अवस्था छ । यस्तै, २ करोड २० लाख बेलायतीहरुको सेवा निवृत्त जीवनको वित्तीय योजना छैन । यस्तै, ५३ लाख बेलायती बालबालिकाहरुसँग आधारतूत वित्तीय शिक्षाको अभाव छ ।

बेलायतमा सरकारी तबरबाट पछिल्लो पटक सन् २०१८ मा गरिएको सर्वेक्षणको नतिजा हो यो । त्यहाँ पहिलो पटक सन् २०१५ मा यस्तो सर्वेक्षण गरिएको थियो । त्यसपछि थप प्रश्नावली तथा परिमार्जनसहित पुनः २०१८ मा गरिएको यो सबैभन्दा पछिल्लो सर्वेक्षण नतिजा हो ।

यो 'फाइनान्सियल केपेबिलिटी सर्भे' ले समग्रतामा बेलायतीहरुको वित्तीय सक्षमता दर मापन गरी नीति निर्माताहरुलाई सहज तुल्याउने उद्देश्य लिएको थियो ।

बेलायत सरकारले तयार पारेको यू के स्ट्रयाटेजी फर फाइनान्सियल वेलबिइङले सन् २०३० सम्ममा माथिको अवस्थामा तात्विक सुधार ल्याउने लक्ष्य लिएको छ । इंगल्याण्ड, स्कटल्याण्ड, उत्तरी आयरल्याण्ड र वेल्स गरी बेलायतको कुल जनसंख्या हाल ६ करोड ६० लाख बढी रहेको छ ।