काठमाडौं । श्रीलंकामा भोलिदेखि आयोजना हुने अन्तर्राष्ट्रिय तालिममा सहभागिता जनाउन नेफ्स्कून सञ्चालक लक्ष्मी सापकोटा आज कोलम्बो पुग्नुभएको छ । 

भारतस्थित कृषि बैंकिङका लागि अन्तर्राष्ट्रिय सहायता तथा प्रशिक्षण केन्द्र (सिक्ट्याब) र बैकुण्ठ महेता नेशनल इन्स्टिच्युट अफ कोअपरेटिभ म्यानेजमेन्ट (भ्याम्निकोम) ले नेशनल कोअपरेटिभ काउन्सिल अफ श्रीलंका तथा तथा त्यहाँस्थित सिक्ट्याब सदस्यहरुको संयुक्त आयोजनामा हुने International Training Program on 'Management Strategies to Develop Consumer Cooperatives' विषयक तालिम जुलाई ८ देखि ११ सम्म सञ्चालन हुनेछ । 

यसैबीच, सञ्चालक सापकोटालाई नेफ्स्कूनका अध्यक्ष चन्द्रप्रसाद ढकाल तथा प्रमुख कार्यकारी अधिकृत डा. शिवजी सापकोटाले आज बिहान बिदाइ गर्नुभएको थियो । उक्त अवसरमा नेफ्स्कूनका प्रशासन अधिकृत सुभाष गौतम पनि सहभागी हुनुहुन्थ्यो । सञ्चालक सापकोटासँगै नेफ्स्कूनकी प्रशासन सहायक अनु कडेल पनि तालिममा सहभागी हुनुहुन्छ ।

तालिममा श्रीलंकाली २० जना तथा सार्क मुलुकका सिक्ट्याब सदस्य संस्थाका १० जना गरी ३० जनाको सहभागिता हुने बताइएको छ । तालिममा अनुभव आदानप्रदानसँगै, श्रव्यदृश्य, लेक्चर तथा अवलोकन भ्रमणको विधिहरु प्रयुक्त हुने सिक्ट्याबले जनाएको छ ।

तालिममा सहकारी व्यवसायको प्रारुप, यसबारे सिक्ट्याब सदस्यहरुको धारणा, व्यवस्थापन रणनीति, भूमण्डलीकृत अर्थतन्त्रमा सहकारीका चुनौतीहरु लगायतका विषयमा तालिममा सिकाइ तथा अनुभव आदान हुने कार्यक्रम रहेको छ ।