काठमाडौं । एशियाली ऋण महासंघ (अकू) को ४३औं वार्षिक साधारण सभाले ५ सदस्यीय सञ्चालक समिति निर्वाचित गरेको छ । इन्डोनेसियाको बालीमा आज आयोजित सभाले सन् २०२४ देखि सन् २०२६ सम्मका लागि महासंघको नयाँ सञ्चालक समिति निर्वाचित गरेको हो । निर्वाचन परिणाम अनुसार नेपालबाट नेफ्स्कून र श्रीलंकाको केन्द्रीय बचत संघ सानसा वैकल्पिक सदस्य चुनिएका छन् । समान मत प्राप्त गरेका दुबै केन्द्रीय संघ तथा अकूबीचको छलफल पछि नेपाल (नेफ्स्कून) पहिलो नम्बरमा पर्न सफल भएको हो ।

सभाले दक्षिण कोरिया (योनसिक किम), इन्डोनेसिया (डा. वारा साबोन डोमिनिकस), ताईवान (ली चुन फेन), थाइल्याण्ड (दानुक्रित कालाम्पाकोम) र फिलिपिन्स (सोलेड्याड भि. कावान्गिस) लाई सञ्चालक निर्वाचित गरेको हो भने नेपालबाट नेफ्स्कूनका अध्यक्ष चन्द्रप्रसाद ढकाल तथा श्रीलंकाली केन्द्रीय बचत संघ सानसाका एडी वालिसिङ्घेलाई वैकल्पित निर्वाचित गरेको हो ।

वैकल्पिक सञ्चालक मध्येपनि पहिलो नम्बरमा पर्ने सदस्य सञ्चालक बन्ने सम्भावना प्रवल रहन्छ । अकू सञ्चालक समितिका निर्वाचितमध्ये कारणवश कुनै सञ्चालकको पद रिक्त भएमा स्वतः पहिलो नम्बरमा रहेको संघको प्रतिनिधि सञ्चालक बन्ने प्रचलन छ । यसअघि, अकूको सञ्चालकमा नेफ्स्कूनबाट पहिलो पटक चुनिनुभएका संघका पूर्व अध्यक्ष ऋषिराज घिमिरे पनि यसैगरी वैकल्पिक सञ्चालकमार्फत कोषाध्यक्ष बन्नुभएको थियो । विगतमा पनि नेफ्स्कूनले यस्तो वैकल्पिक सञ्चालक भएका कारण यो पटकको उपलब्धिले थप सम्भावनाहरुको ढोका खुल्ने दाबी संघका अध्यक्ष चन्द्रप्रसाद ढकालले जानकारी गराउनुभयो । अध्यक्ष ढकालले बालीबाट भन्नुभयो, 'साझा क्षेत्रीय मञ्चमा हाम्रो उपस्थितिलाई यो सम्भावनाले थप बलियो बनाएको छ । नेपालको साकोस अभियानका विषयहरु अकूको फोरममा अब अझ प्रखर रुपमा प्रस्तुत गर्ने अवस्था सृजना भएको छ ।'

निर्वाचनबाट कोरियाली अभियन्ता किम निवर्तमान सञ्चालक समिति पनि निर्वाचित हुनुहुन्थ्यो । उहाँ अकूका निवर्तमान अध्यक्ष हुनुहुन्छ । यसैगरी, थाइ अभियन्ता कालाम्पाकोम त्यहाँको केन्द्रीय बचत संघ (एफएससीटी) का उपाध्यक्ष हुनुहुन्छ । यसअघि, अकूको निवर्तमान सञ्चालक समितिमा एफएससीटीका अध्यक्ष प्रथम उपाध्यक्ष हुनुहुन्थ्यो ।

यसैगरी, ताईवानी केन्द्रीय संघकी अध्यक्ष ली चुन फेन अकूको निवर्तमान द्धितिय उपाध्यक्ष हुनुहुन्थ्यो । इन्डोनेसियाका डा. वारा साबोन डोमिनिकस त्यहाँको केन्द्रीय संघ सीयूसीओका अध्यक्ष हुनुहुन्छ । उहाँ यो सञ्चालक समितिमा नयाँ निर्वाचित हुनुभएको हो । यसैगरी, फिलिपिन्सको नाट्कोकी सोलेड्याड भि. कावान्गिस पनि पहिलो पटक निर्वाचित हुनुभएको हो । यद्यपि, निवर्तमान सञ्चालक समितिको सचिवमा नाट्कोको प्रतिनिधित्व रहेको थियो । निवर्तमान सञ्चालक समितिमा रहेको भारत भने यो पटक निर्वाचित भएन । भारको पूर्णस्थित महाराष्ट्र राज्य सहकारी पतसंस्था फेडेरेशन लि.(माफ्कोक्स) का अध्यक्ष ओमप्रकाश दादाप्पा निवर्तमान सञ्चालक समितिका कोषाध्यक्ष हुनुहुन्थ्यो ।

साधारण सभाले सन् २०२३ सेप्टेम्बर १७ मा काठमाडौंमा सम्पन्न ४२औं साधारण सभाको माइन्यूट स्वीकृत गर्नुका साथै अध्यक्ष, सचिव, कोषाध्यक्ष तथा व्यवस्थापनको तर्फबाट प्रमुख कार्यकारी अधिकृतको प्रतिवेदन पारित गरेको छ भने बाह्य लेखापरिक्षकको नियुक्ति पनि गरेको छ । 

यसैगरी, सभाले अकूको आर्थिक वर्ष २०२४-२५ को योजना तथा बजेट पारित गर्नुका साथै प्रत्येक सदस्य संघहरुले आफ्ना गतिविधि समेटिएको संक्षिप्त लिखित प्रतिवेदन (बढीमा ५ मिनेट लामो) पढेर सुनाएका छन् । यस्तै, सभाले अकू सञ्चालक समितिले पारित गरेको नयाँ अफिलिएट सदस्यको अनुमोदन पनि गरेको छ भने अकूको आगामी तीन वर्षको वर्किङ क्यालेन्डर पनि पास गरेको छ ।