एजेन्सी । अन्तर्राष्ट्रिय सहकारी महासंघको सञ्चालक समितिले हिजो भारतीय राजधानी नयाँ दिल्लीमा संयुक्त राष्ट्र संघीय अन्तर्राष्ट्रिय सहकारी वर्ष (आईवाईसी) २०२५ को सन्दर्भमा झण्डोत्तोलन कार्यक्रम सम्पन्न गरेको छ । उक्त कार्यक्रममा सहकारीको झण्डा तथा (आईवाइसी) को झण्डा फहराइएको थियो । उक्त झण्डोत्तोलन कार्यक्रमले सहकारी अभियानभित्र एकता तथा सहकार्यको सन्देश विश्व सामु सञ्चार गरेको आईसीएले जनाएको छ ।

भारतसँगै केन्या, बेल्जियम, कोष्टारिकादेखि विभिन्न मुलुकहरुका सहकारी अभियानले समेत आईवाईसीको झण्डोत्तोलन कार्यक्रम सम्पन्न गरेका छन् । अन्तर्राष्ट्रिय सहकारी महासंघले हिजोको दिनलाई विश्व सहकारी अभियानका लागि गर्व गर्न लायक ऐतिहासिक एवम् स्मारणीय दिन भएको दाबी गरेको छ । हिजोको सम्मेलनमा १ सय ७ मुलुकका ३ हजार सहकारीकर्मीहरुको सहभागिता रहेको आइसीएले जनाएको छ ।

झण्डोलोत्तन कार्यक्रम पछि आईसीएको बोर्ड बैठक पनि हिजै सम्पन्न भएको थियो । २५ नोभेम्बरबाट सुरु भएको सम्मेलन ३० नोभेम्बरसम्म चल्नेछ ।