गोरखा । नेपाल बचत तथा ऋण केन्द्रीय सहकराी संघ लि.(नेफ्स्कून) लमजुङ सदस्य सेवा कार्यालयको आयोजनामा गोरखामा व्यवसाय प्रवर्द्धन बैठक तथा अन्तरक्रिया सम्पन्न भएको छ । वैशाख २८, गते आइतबार गोरखा जिल्लामा आयोजित अन्तरक्रिया कार्यक्रममा विभिन्न १९ वटा बचत तथा ऋण सहकारी संस्थाबाट ३१ जनाको सहभागिता रहेको थियो । 
 
अन्तरक्रियाका क्रममा सहकारी देखिएका समसामयिक समस्याहरु, समस्याका कारण र समाधानका उपायहरुको बारेमा बिस्तृत छलफल भएको थियो । साथै नेफ्स्कूनले सञ्चालन गर्दै आएको अन्तरलगानी सेवा, स्तरीकरण कार्यक्रम साथै व्यवसाय विकास र लगानी प्रवर्द्धनको विषयमा सहभागीहरुले आफ्ना जिज्ञासाहरु राखेका थिए । 

कार्यक्रम समापनका अवसरमा लमजुङ सदस्य सेवा कार्यालय व्यवस्थापन उपसमितिका सदस्य मेन बहादुर अधिकारीले सहकारी अध्यादेश र राष्ट्र बैंकद्वारा जारी निर्देशन तथा मापदण्डका कारण बचत तथा ऋणको कारोबार गर्ने सहकारी संस्थाहरुमा पर्ने असहजताको समाधान खोज्न केन्द्रीय संघ नेफ्स्कूनको भूमिका महत्वपूर्ण रहने बताउनुभयो । उहाँले सहकारी संस्थाको कारोबारलाई खुम्चाउने नीतिगत प्रावधानहरु हटाउन नेफ्स्कूनले बिशेष पहल गर्नुपर्ने र त्यसमा सबैको साथ सहयोग रहने धारणा व्यक्त गर्नुभयो । 

सहकारी संस्थाहरूको सशक्तिकरण, लगानी प्रवर्द्धन मार्फत सदस्यहरुमा उद्यमशीलताको विकास साथै व्यवसाय प्रवर्द्धनमा सहयोग पुर्याउने उद्देश्यले अन्तरक्रिया कार्यक्रम आयोजना गरिएको थियो । अन्तरक्रियामा लघु तथा साना व्यवसाय प्रवद्र्धनका रणनीतिहरू, सहकारीहरूमा वित्तीय पहुँचको विस्तार, उद्यमशिलता विकास जस्ता विषयहरुमा अभिमुखिकरण गरिएको थियो ।

कार्यक्रमका अवसरमा उठेका सहभागीहरुको जिज्ञासाको सम्बोधन सहति अन्तरक्रियाको सहजिकरण नेफ्स्कूनकी कार्यक्रम अधिकृत सोबिता मैनालीले गर्नु भएको थियो । कार्यक्रमको व्यवस्थापन लमजुङ सदस्य सेवा कार्यालय प्रमुख सन्देश घिमिरेले गर्नुभएको थियो ।