काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) बचत तथा ऋण सहकारी संस्थाहरुलाई सुव्यवस्थित, मर्यादित  एवं विधिसम्मत तरिकाले सञ्चालन गरी सुशासनको स्तरमा उत्कृष्टता कायम गराउने उद्देश्यसहित एकीकृत स्वनियमन मार्गनिर्देशिका, २०८० तयारीको क्रममा जुटेको छ ।

बचत तथा ऋण सहकारीका सिद्धान्त तथा असल अभ्यासहरु विकास गर्न निर्देशिका मार्फत महत्वपूर्ण आधार तयार हुने भएकोले संघले यसपटक समग्र बचत ऋण अभियानको स्वामित्व रहने गरि प्रदेश बचत संघ र जिल्लास्तरीय बचत संघका प्रतिनिधिहरुबीच संयुक्त छलफल गरेको हो । 

संघको कार्यालयमा आइतबार आयोजित छलफल कार्यक्रममा नेफ्स्कूनका अध्यक्ष परितोष पौड्याल, लेखा सुपरिवेक्षण समितिका संयोजक नबराज सापकोटा, सञ्चालक सदस्य घनश्याम अधिकारी, नेफ्स्कून व्यवस्थापन टिम सहित प्रदेश बचत संघका अध्यक्ष उद्धव सापकोटा, काठमाडौं, ललितपुर, भक्तपुर र काभ्रे जिल्ला बचत संघका प्रतिनिधिहरुको उपस्थिति रहेको थियो । 

संघले आफ्नो ३३औं स्थापना दिवसको अवसरमा एकीकृत स्वनियमन मार्गनिर्देशिका, २०७७ प्रकाशन गरेको थियो । एकीकृत स्वनियमन मार्गनिर्देशिका–२०७७, ८ परिच्छेद सहित १३२ पृष्ठको छ, जुन प्रत्येक बर्ष संशोधन सहित आभियानबीच कार्यान्वयनमा रहेको छ । संघले यही श्रावण ३२ गते ३६औं स्थापना दिवसको अवसरमा अभियानबीचको वृहत छलफल सहित एकीकृत स्वनियमन मार्गदिर्नेशिका, २०८० प्रकाशनको तयारीमा जटेको हो ।