एजेन्सी । बेलायतमा गत ४ जुलाईमा सम्पन्न आम निर्वाचनमा 'कोअप पार्टी' का ४३ उम्मेदवार विजयी भएका छन् । ६ सय ५० सदस्यीय बेलायती संसदको तल्लो सदन हाउस अफ कमन्समा संख्यात्मक हिसाबले 'कोअप पार्टी' ले हासिल गरेको यो अहिलेसम्मको सबैभन्दा ठूलो विजय हो । 

संसदमा अत्यधिक मतसहित विजयी लेबर पार्टीसँग चुनावी तालमेल गरेको 'कोअप पार्टी' का तर्फबाट उम्मेदवार भएका ४९ मध्ये ४३ जना सांसद भएका हुन् । दुई दलले ‘लेबर एण्ड कोअपरेटिभ’ भनेर तालमेल गरेका थिए भने सोही नामबाट ४९ उम्मेदवार निर्वाचनमा उठाएका थिए । 

विश्व सहकारी अभियानको राजधानी भनेर चिनिने रोचडेलको निर्वाचन क्षेत्रबाट पनि पहिलो पटक कोअप पार्टीका उम्मेदवार विजयी भएका छन् । 

स्मरणीय छ, अन्तर्राष्ट्रिय सहकारी महासंघ (आईसीए) की प्रथम महिला अध्यक्ष डेम पलिन ग्रीन पनि लेबर एण्ड कोअपरेटिभको तर्फबाट बेलायतको प्रतिनिधित्व गर्दै विगतमा युरोपेली संसदमा निर्वाचित हुनुभएको थियो ।

यसैबीच, निर्वाचन परिणामबाट उत्साहित कोअप पार्टीका तर्फबाट महासचिव जो फच्र्युनले बेलायतमा अब सहकारितामा आधारित राजनीति शुरु भएको धारणा व्यक्त गर्नुभयो । यो विजयले बेलायतमा सहकारी क्षेत्रमा आवश्यक नीतिगत सुधारहरु सहित यस क्षेत्रको विकास र वृद्धिमा महत्वपूर्ण भूमिका खेल्ने विश्वास कोअप पार्टीले गरेको छ ।

सन् १९१७ अक्टोबर १७ मा स्थापना भएको कोअपरेटिभ पार्टीले आफूलाई बेलायती सहकारी अभियानको पार्टी भएको दाबी गर्दै आएको छ ।