एजेन्सी । दक्षिण अमेरिकी मुलुक ब्राजिलका ३ सय बढी स्थानीय तहमा सहकारी एकमात्रै वित्तीय सेवा प्रदायकको रुपमा स्थापित छन् । अन्य कुनै बैंक वित्तीय संस्था नरहेका ती स्थानमा स्थानीय क्रेडिट युनियनहरुले नागरिकहरुलाई सेवा उपलब्ध गराइरहेका छन् । क्रेडिट युनियनहरु एक मात्र वित्तीय सेवा प्रदायक संस्थाका रुपमा स्थानीहरुको विश्वास आर्जन गर्न सफल छन् । बाणिज्य बैंकहरु नपुगेका र खासमा उनीहरुको कुनै रुचि नभएको ती ३ सय बढी स्थानमा त्यहाँका क्रेडिट युनियन (बचत ऋण सहकारी) हरु स्थानीयहरुलाई सेवारत छन् । 

ब्राजिलियन सहकारीहरुको केन्द्रीय संघ–(ओसीबी) की महाप्रबन्धक फ्याबिओला मोटोले संयुक्त राष्ट्र संघको मुख्यालय न्यूयोर्कमा यही जुलाई ९ मा सम्पन्न दोस्रो अन्तर्राष्ट्रिय सहकारी वर्ष घोषणाको ‘सफ्ट लञ्च’ कार्यक्रममा आफ्नो मुलुकमा सहकारी अभियानको महत्व उल्लेख गर्दै उक्त जानकारी गराएकी हुन् ।