एजेन्सी । अन्तर्राष्ट्रिय सहकारी महासंघ (आईसीए) को वार्षिक साधारणसभाले सन् २०२६ देखि सन् २०३० सम्मका लागि नयाँ रणनीतिक योजना पारित गरेको छ । यसअघि नै आईसीएले दशकीय रणनीतिक योजना निर्माण गर्दै आएको थियो । पछिल्लो पटक आईसीएले सन् २०२० देखि सन् २०३० सम्मको रणनीतिक योजना तय गरेपनि यो पटक उक्त योजना परिमार्जन गर्दै नयाँ ५ वर्षे रणनीतिक योजना पारित गरेको हो । यद्यपि, यसबारे धेरै विषयहरु खुलाइएको छैन ।

बेलायतको म्यान्चेष्टरस्थित रोचडेल शहरमा जुलाई २ मा आयोजित सभाले आगामी वर्ष अर्थात् सन् २०२६ को आईसीएको वार्षिक सभा मध्य अमेरिकी मुलुक पनामा आयोजना गर्ने निर्णय समेत गरेको छ । सभाले ग्वाटेमालाको प्रस्तावमा विश्व सहकारी अभियानका अग्रणीहरु रोचडेल पायोनिर्यसहरुको योगदानको कदर गर्दै स्ट्यान्डिङ ओभेसन (उठेर ताली बजाउँदै सम्मान) प्रदान गरेको छ ।

रोचडेलमा आईसीएको वार्षिक साधारणसभा

विश्वका ६० बढी मुलुकका सहकारी अभियानकर्मीहरु बेलायतको म्यान्चेष्टरस्थित रोचडेल शहरमा भेला भएका छन् । अन्तर्राष्ट्रिय सहकारी महासंघ (आईसीए) को वार्षिक साधारणसभा बेलायतको ग्रेटर म्यानचेष्टरको रोचडेल शहरमा सहभागी हुने सिलसिलायमा यो अन्तर्राष्ट्रिय सहकारी जमघट भएको हो । यसै समय पारेर बेलायती सहकारी अभियानको आयोजनामा कोअरेटिभ कंग्रेस पनि भैरहेको छ । अन्तर्राष्ट्रिय सहकारी वर्ष २०२५ को सन्दर्भ पारेर यो वर्षको आईसीएको वार्षिक साधारण सभा सहकारी अभियानको जननी बेलायतमा आयोजना गरिएको हो । करिब १ सय ८० वर्षअघि बेलायतको त्यही रोचडेल शहरबाट सहकारी अभियानको औपचारिक थालनी भएको थियो । प्रत्येक वर्ष जुलाईको पहिलो शनिबार मनाइने अन्तर्राष्ट्रिय सहकारी दिवसको अवसरमा कार्यक्रम आयोजना गरिएको हो ।