काठमाडौं । आजबाट सन् २०२५ आरम्भ भएसँगैे  संयुक्त राष्ट्र संघीय अन्तर्राष्ट्रिय सहकारी वर्ष (आईवाईसी) २०२५ को औपचारिक शुभारम्भ भएको छ । नेफ्स्कूनको केन्द्रीय कार्यालयमा राखिएको अन्तर्राष्ट्रिय सहकारी वर्षको लोगो अनवारण गरेर संघका अध्यक्ष चन्द्र प्रसाद ढकालले अन्तर्राष्ट्रिय सहकारी वर्षको औपचारिक घोषणा सहित ऐक्यवद्धता जाहेर गर्नुभएको थियो । सो कार्यक्रममा संघका निवर्तमान अध्यक्ष परितोष पौड्याल, प्रमुख कार्यकारी अधिकृत डा. शिवजी सापकोटा, संघका केही उपस्थित सञ्चालक सदस्यहरु र कर्मचारीहरुको सभागिता रहेको थियो । 

संयुक्त राष्ट्र संघले ११ जुन २०२४ मा सन् २०२५ लाई अन्तर्राष्ट्रिय सहकारी वर्ष घोषणा गरेको थियो । सहकारी वर्षको नारा ‘सहकारीले राम्रो विश्व निर्माण गरौँ’ रहेको छ । नोभेम्बर २५ देखि ३० सम्म भारतको नयाँ दिल्लीमा भएको अन्तर्राष्ट्रिय सहकारी सम्मेलनमा भारतीय प्रधानमन्त्री नरेन्द्र मोदीले सहकारी वर्ष २०२५ को औपचारिक एवम् विधिवत् शुभारम्भ गर्नुभएको थियो ।