म्याग्दी । बेनी नगरपालिका–८, म्याग्दीमा अवस्थित भूतपूर्व सैनिक बचत तथा ऋण सहकारी संस्था लिमिटेड र नेपाल बचत तथा ऋण केन्द्रीय सहकारी संघ लिमिटेड (नेफ्स्कून) बीच नियमित निरीक्षण तथा अनुगमन कार्यक्रमको सम्झौता पौष २३ गते सम्पन्न भएको छ ।

सहकारी ऐन, २०७४ को दफा २५, ९९ र १०३ को कार्यान्वयन, सहकारीका सात सिद्धान्त तथा बचत तथा ऋण सहकारीका चार सिद्धान्तको प्रभावकारी अभ्यास, दुवै पक्षका विनियम, नीति तथा कार्यक्रमअनुसार सहकारी क्षेत्रको प्रवर्द्धन गर्ने उद्देश्यले उक्त सम्झौता गरिएको हो ।

सम्झौता मार्फत विद्यमान जोखिमको पहिचान तथा व्यवस्थापन गर्दै सहकारी वित्त क्षेत्रमा उपलब्ध नवीनतम प्रविधिको प्रयोग, निरन्तर प्रवर्द्धन, विकास र संरक्षण गर्दै क्षेत्रगत स्थायित्व सुनिश्चित गर्ने लक्ष्य लिइएको छ । साथै सहकारी मर्मअनुसार स्व–नियमनको अभ्यासलाई सुदृढ बनाउने उद्देश्यसमेत रहेको छ ।

सम्झौता कार्यक्रममा साकोसको तर्फबाट उपाध्यक्ष, कोषाध्यक्ष, समिति सदस्य तथा व्यवस्थापकको उपस्थिति रहेको थियो भने नेफ्स्कूनको तर्फबाट कार्यक्रम अधिकृत मनोज खड्काको सहभागिता रहेको थियो ।