महोत्तरी । घर आँगन नियमित बचत तथा ऋण सहकारी संस्था लिमिटेड, महोत्तरीमा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले पौष २३ गते स्थलगत सुपरिवेक्षण सम्पन्न गरेको छ।

सहकारी क्षेत्रमा पारदर्शिता, उत्तरदायित्व र सदस्य हितको सुनिश्चितता गर्ने उद्देश्यले नेफ्स्कूनले सहकारी संस्थाहरूमा स्थलगत सुपरिवेक्षणलाई प्रभावकारी रूपमा अघि बढाउँदै आएको छ। सोही क्रममा सम्पन्न सुपरिवेक्षणमा बचत, ऋण, लेखापरीक्षण, लगानी तथा आर्थिक कारोबारको वास्तविक अवस्था, सदस्यहरूले प्राप्त गर्ने सेवा–सुविधा, लाभांश, समावेशी सहभागिता, संस्थाभित्र देखिन सक्ने त्रुटि, आर्थिक जोखिम तथा व्यवस्थापकीय सुधारका विषयमा मूल्यांकन गरिएको थियो।

साथै संस्थाको निर्णय प्रक्रिया, नेतृत्वको पारदर्शिता र उत्तरदायित्व, सदस्य सहभागिता, प्रविधिमा आधारित सदस्य सूचना प्रणालीको प्रयोगमार्फत जोखिम विश्लेषण गरी जोखिम न्यूनीकरणका उपाय खोज्नु पनि सुपरिवेक्षणको प्रमुख उद्देश्य रहेको छ।

नेफ्स्कूनको तर्फबाट कार्यक्रम अधिकृत रामकृष्ण भट्टराई र सहजकर्ता श्याम बुढाथोकीको उपस्थितिमा सम्पन्न स्थलगत सुपरिवेक्षण कार्यक्रममा घर आँगन नियमित साकोसका सञ्चालक समिति, लेखा सुपरिवेक्षण समिति, ऋण उपसमिति तथा कर्मचारीहरूको सक्रिय सहभागिता रहेको थियो।

सुपरिवेक्षणका क्रममा संस्थाको विनियम, नीति तथा आन्तरिक कार्यविधि, सम्पत्ति शुद्धीकरण निवारणसम्बन्धी नियामक निकायबाट प्राप्त निर्देशनको पालना, भाखा नाघेको ऋण असुली, पुँजी पर्याप्तता अनुपातको विश्लेषण लगायत समग्र वित्तीय अवस्था तथा सहकारीले प्रदान गर्दै आएका सेवा–सुविधाबारे विस्तृत छलफल गरिएको थियो।

सुपरिवेक्षकबाट प्राप्त सुझावहरूलाई संस्थागत पृष्ठपोषणका रूपमा ग्रहण गर्दै ती सुझावहरूबारे सञ्चालक समितिको आगामी बैठकमा विस्तृत छलफल गरी कार्यान्वयनमा लैजाने निर्णय भएको छ।