गैडाकोट । विकू बचत तथा ऋण सहकारी संस्था लिमिटेडले सहकारीका सिद्धान्त सामाजिक उत्तरदायित्व अन्तर्गत रत्ननगर नगरपालिका १२, जिरौनामा प्रतीक्षालय हस्तान्तरण तथा ज्येष्ठ सदस्य सम्मान कार्यक्रम चैत्र २१ गते सम्पन्न गरेको छ ।

“ज्येष्ठ अग्रज सदस्यसँग विकू आशीर्वाद” कार्यक्रममा आयोजित उक्त कार्यक्रममा बागदेवी किसान टोल विकास समितिको संयोजनमा आयोजित कार्यक्रममा विकू प्रतीक्षालय बागदेवी किसान टोल विकास संस्थालाई हस्तान्तरण गरेको हो ।

कार्यक्रममा वडा नं. १२ का वडाध्यक्ष सुन्दरमणी सुवेदी प्रमुख अतिथि तथा अध्यक्षता संस्थाका अध्यक्ष प्रेमप्रसाद सापकोटाले गर्नुभएको थियो । कार्यक्रममा स्थानीय जनप्रतिनिधि, टोल विकास समितिका पदाधिकारी, सहकारीका शेयर सदस्य तथा कर्मचारीहरूको उपस्थिति रहेको थियो ।

कार्यक्रमको मुख्य आकर्षणका रूपमा ज्येष्ठ सदस्य सम्मान गरिएको थियो । सो अवसरमा स्थानीय अग्रज सदस्यहरूलाई दोसल्ला ओढाएर सम्मान गर्नुका साथै संस्थाको तर्फबाट पोषिलो खाद्य सामग्री (मह) र हिँडडुलमा सहजताका लागि टेक्ने लठ्ठी वितरण गरिएको थियो ।

कार्यक्रममा बोल्दै वडाध्यक्ष सुवेदीले सहकारीले वित्तीय सेवासँगै सामाजिक उत्तरदायित्वका क्षेत्रमा समेत उल्लेखनीय कार्य गरेको उल्लेख गर्दै संस्थाप्रति धन्यवाद व्यक्त गर्नुभयो । त्यस्तै, उपस्थित अतिथिहरूले विकू साकोसले सामाजिक एकता अभिवृद्धि तथा समुदाय सेवामा महत्वपूर्ण भूमिका निर्वाह गरेको भन्दै प्रशंसा गरेका थिए ।

साकोसले “गर्भदेखि स्वर्गसम्मका कार्यक्रमहरू” मार्फत सदस्य तथा समुदायमा सेवा विस्तार गर्दै आएको जनाएको छ ।