काठमाडौं — ६९ औं राष्ट्रिय सहकारी दिवसको अवसरमा नेपालमा पहिलो पटक सार्वजनिक सवारी साधनको भाडा डिजिटल माध्यमबाट भुक्तानी गर्ने प्रणाली सुरु गरेको छ । चैत २० गते चन्द्रागिरि बचत तथा ऋण सहकारी संस्था लिमिटेडले फिनटेक इन्टरनेशनल प्रा.लि.सँग सहकार्य गर्दै उक्त सेवा औपचारिक रूपमा शुभारम्भ गरेको हो ।

नयाँ प्रणाली अन्तर्गत यात्रुहरूले ‘यात्रा कार्ड’ वा मोबाइल एप मार्फत क्यूआर कोड स्क्यान गरी बस भाडा तिर्न सक्नेछन् । बसमा चढ्दा र ओर्लँदा कार्ड ट्याप गर्ने वा मोबाइल एप प्रयोग गरेर सहज रूपमा भुक्तानी गर्न सकिने व्यवस्था गरिएको छ ।

फिनटेक इन्टरनेशनल प्रा.लि.का प्रमुख कार्यकारी अधिकृत अमित श्रेष्ठका अनुसार यो सेवा नेपालमै पहिलो पटक कार्यान्वयनमा ल्याइएको हो । यसले नगदरहित भुक्तानी प्रणालीलाई प्रवद्र्धन गर्नुका साथै सार्वजनिक यातायात क्षेत्रलाई आधुनिक र व्यवस्थित बनाउने विश्वास लिइएको छ ।

चन्द्रागिरि साकोसका प्रमुख कार्यकारी अधिकृत कृष्ण कुमार श्रेष्ठका अनुसार संस्थाका सदस्यहरूले यस सेवामार्फत बस भाडामा २५ प्रतिशतसम्म छुट प्राप्त गर्नेछन् । साथै, यात्रा कार्ड प्रयोग गरी युटिलिटी बिलहरू समेत भुक्तानी गर्न सकिने सुविधा उपलब्ध गराइएको बताउनुभयो ।

यस पहलले डिजिटल भुक्तानी प्रणालीको विस्तार, पारदर्शिता अभिवृद्धि तथा यात्रुहरूलाई सहज सेवा प्रदान गर्ने अपेक्षा गरिएको छ ।