कास्की । कास्की जिल्ला पोखरा महानगर वडा न ८ सिमलचौरमा रहेको सृजना महिला बचत तथा ऋण सहकारी संस्था लिमिटेडले २५औं स्थापना दिवस (रजत जयन्ती) विविध कार्यक्रमका साथ वैशाख ०२ गते सम्पन्न गरेको छ ।

संस्थाका अध्यक्ष शारदा गिरिको अध्यक्षतामा तीन दिवसीय कार्यक्रम आयोजना गरिएको थियो । उक्त कार्यक्रम अन्तर्गत रक्तदान, सरसफाइ, दीप प्रज्वलन, शुभकामना आदान–प्रदान तथा सम्मान कार्यक्रमहरू गरिएका थिए ।

संस्थाको स्थापना कालदेखि सहयोग पु¥याउनु हुने समाजसेवी अभिभावक विष्णु प्रसाद बराल तथा नेपालकै परिचित सामाजिक संस्था ‘सृजना विकास केन्द्र’लाई सम्मान गरिएको थियो । साथै, संस्थामा उत्कृष्ट बचत तथा ऋण कारोबार गर्ने शेयर सदस्यहरू र बाल बचतकर्ताहरूलाई पुरस्कृत गरिएको थियो । संस्थाका पूर्व अध्यक्षहरूलाई समेत सम्मान प्रदान गरिएको थियो ।

वि.सं. २०५८ साल चैत महिनामा स्थापना भई २०५९ साल बैशाख ०२ गते तत्कालीन सहकारी प्रशिक्षण तथा डिभिजन कार्यालय, कास्कीमा दर्ता भएको सृजना महिला साकोसमा हाल १,२२२ जना शेयर सदस्य रहेका छन् भने कुल कारोबार रु. १८ करोड ७६ लाख २२ हजार ४ सय ९५ रहेको साकोसका अध्यक्ष शारदा गिरिले बताउनु भएको छ ।