गैंडाकोट, नवलपुर । विकू बचत तथा ऋण सहकारी संस्था लि. गैडाकोटको आयोजना तथा नेपाल बचत तथा ऋण सहकारी संघ लि. (नेफस्कून) को प्राविधिक सहजीकरण र जर्मन स्पार्कसेन्स्टिफ्टुङ्ग (German Sparkassenstiftung) को सहयोगमा कृषक व्यवसाय खेल तालिम गैडाकोटमा वैशाख २० गते सम्पन्न भएको छ । 

३५ जना महिला कृषकहरुका लागि वैशाख १८ गतेबाट सञ्चालन भएको तालिम एक विशेष समारोहका बीच समापन भएको छ । संस्थाका अध्यक्ष प्रेमप्रसाद सापकोटाको अध्यक्षतामा सम्पन्न समापन कार्यक्रममा संस्थाका विभिन्न पदाधिकारीहरूको उपस्थिति रहेको थियो । तालिमको मुख्य उद्देश्य परम्परागत कृषि प्रणालीमा अभ्यस्त कृषकहरूलाई आधुनिक र व्यावसायिक पद्धतितर्फ रूपान्तरण गर्नु रहेको थियो । 

तिन दिनसम्म चलेको उक्त सघन तालिममा सहभागीहरूले ’खेल’ र ’अभ्यास’ का माध्यमबाट व्यवसाय गर्दा आइपर्ने व्यावहारिक चुनौती र त्यसको समाधानका उपायहरूबारे गहन ज्ञान हासिल गरेका छन् । विशेषगरी बाली तथा पशुपालनको सही छनौट, उत्पादनका क्रममा हुनसक्ने मौसमी जोखिमको व्यवस्थापन, र वित्तीय औजारहरूको सही सदुपयोग जस्ता विषयमा कृषकहरूलाई दक्ष बनाइएको छ । 

नेफ्स्कून अधिकृत तथा तालिमका प्रशिक्षक रिता सुवेदी र यमकला सुवेदीले सहभागीहरूलाई बचत, ऋण र कृषि बीमाका माध्यमबाट भविष्यमा आउन सक्ने वित्तीय संकटलाई कसरी व्यवस्थापन गर्ने र बजारको मागअनुसार ग्राहकसँगको सम्बन्ध कसरी विस्तार गर्ने भन्नेबारे प्रयोगात्मक प्रशिक्षण दिनुभएको थियो ।

समापनका अवसरमा आफ्नो अनुभव साझा गर्दै सहभागी कृषक सदस्यहरू दुर्गा कंडेल लामिछाने र निर्मला गिरि ले तालिम अत्यन्तै जीवनोपयोगी रहेको बताउनुभयो । “पहिले हामीले खेतीलाई केवल जीविकोपार्जनको माध्यम मात्र ठानेका थियौं, तर यो तालिमले हामीलाई व्यावसायिक योजना निर्माण, आय–व्ययको सन्तुलन र सम्भावित जोखिमको पूर्वतयारी गर्न सिकाएको कुरा व्यक्त गर्नुभयो । हामीमा कृषिबाटै सफल उद्यमी बन्न सकिन्छ भन्ने पूर्ण आत्मविश्वास पलाएको छ ।“ यस्तो प्रभावकारी र सीपमूलक कार्यक्रम आयोजना गरेकोमा विकू सहकारीप्रति विशेष आभार समेत प्रकट गर्नुभयो ।

कार्यक्रममा उपाध्यक्ष कालिदास गौडेल, प्रमुख कार्यकारी अधिकृत माधव प्रसाद पौडेल र मानवीय स्रोत व्यवस्थापन विभाग प्रमुख मदन सापकोटा तथा व्यावसाय विकास विभाग प्रमुख हरिराम अम्बैको उपस्थिति रहेको थियो । सहभागी कृषकहरूलाई सहभागीताको प्रमाणपत्र वितरण गरिनुका साथै तालिम अवधिभर उत्कृष्ट प्रदर्शन गर्ने कृषक समूहलाई पुरस्कृत समेत गरिएको थियो ।  विकू साकोसले आगामी दिनमा पनि आफ्ना सदस्यहरूको आर्थिक सबलीकरणका लागि यस्ता प्राविधिक र व्यावसायिक कार्यक्रमहरूलाई निरन्तरता दिने लक्ष्य राखेको छ ।