काठमाडौं । राष्ट्रिय सहकारी बैंकको बागमती प्रदेश सञ्चालक पदमा सहकारी अभियन्ता तथा नेपाल बचत तथा ऋण केन्द्रीय सहकारी संघ (नेफ्स्कून) का निवर्तमान अध्यक्ष परितोष पौड्याल निर्वाचित हुनुभएको छ । 

शनिबार सम्पन्न निर्वाचनमा उहाँले प्रतिस्पर्धी रामशरण शर्मा घिमिरेलाई २७५ मतान्तरले पराजित गर्दै विजय हासिल गर्नुभएको हो । 

निर्वाचन परिणामअनुसार पौड्यालले कुल १ हजार ८२७ मत प्राप्त गर्नुभएको थियो भने उहाँका निकटतम प्रतिद्वन्द्वी घिमिरेले १ हजार ५५२ मत प्राप्त गर्नुभएको थियो । 
सहकारी क्षेत्रको नेतृत्व, संस्थागत अनुभव र राष्ट्रियस्तरको नेटवर्कका कारण पौड्यालले बहुप्रदेशीय समर्थन प्राप्त गरेको विश्लेषण गरिएको छ ।

मतपरिणाम हेर्दा पौड्यालले बागमती प्रदेशबाट सर्वाधिक ५८५ मत प्राप्त गर्नुभएको गर्नुभएको छ । त्यसैगरी कोशीबाट ३४४, गण्डकीबाट ३२४, लुम्बिनीबाट २५३, मधेसबाट १४२, कर्णालीबाट १०७ तथा सुदूरपश्चिमबाट ७२ मत प्राप्त गर्नुभएको थियो ।  

यसले उहाँको प्रभाव केवल एक प्रदेशमा सीमित नभई राष्ट्रिय सहकारी वृत्तमै स्थापित रहेको संकेत गरेको सहकारीकर्मीहरूको भनाइ छ ।

राष्ट्रिय सहकारी बैंकको प्रदेश नेतृत्वका लागि सम्पन्न निर्वाचनमा कुल ३ हजार ३९४ मत खसेको थियो, जुन कुल मतदाताको ३९ दशमलव ११ प्रतिशत सहभागिता हो । निर्वाचनमा ८ हजार ६७९ मतदाता रहेका थिए ।

उहाँले नेपालको बचत तथा ऋण सहकारी अभियानको छाता संगठन नेफ्स्कूनको अध्यक्षको जिम्मेवारी समेत सम्हालिसक्नुभएको छ । उहाँको नेतृत्वकालमा सहकारी संस्थाहरूको सुदृढीकरण, वित्तीय अनुशासन, गुणस्तर मापन प्रणाली तथा सहकारी शिक्षाको विस्तारमा उल्लेखनीय पहलहरू अघि बढेका थिए ।