सिमरा । नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजनामा “साकोस जोखिम व्यवस्थापन ३६०” कार्यशाला जेष्ठ १३ गते सिमरामा सम्पन्न भएको छ । 

कार्यशालाको उद्घाटन नेफ्स्कूनका सञ्चालक शोभा राउतले गर्नुभएको थियो भने नेफ्स्कून पूर्व सञ्चालक देवकी नेपालको आतिथ्यता रहेको थियो ।  बचत तथा ऋण सहकारी संस्थाहरूको संस्थागत सुदृढीकरण, जोखिम न्यूनीकरण तथा प्रभावकारी व्यवस्थापन प्रणाली विकास गर्ने उद्देश्यले कार्यशाला आयोजना गरिएको हो ।

कार्यशालामा रौतहट, बारा र पर्सा जिल्लाका २४ वटा सहकारी संस्थाका अध्यक्ष, सञ्चालक, व्यवस्थापक उच्च व्यवस्थापन तथा कर्मचारी गरी ५३ जना प्रतिनिधिहरूको सहभागिता रहेको थियो ।

कार्यशालामा सहभागीहरूले सहकारी संस्थामा देखिन सक्ने सम्भावित जोखिमहरूको पहिचान, जोखिम न्यूनीकरणका उपायहरू तथा दिगो व्यवस्थापन प्रणाली विकास सम्बन्धी विषयमा विस्तृत छलफल गरेका थिए । साथै, स्क्यान कार्यक्रमका सूचकहरू तथा जोखिममा आधारित सुपरिवेक्षण प्रणालीबारे समेत गहन समीक्षा गरिएको थियो ।

नेफ्स्कूनका कानूनी सल्लाहकार शिव अधिकारीले ऋण लगानी गर्दा सुरुवाती चरणमै बलियो र कानुनी रूपमा सुरक्षित कागजातहरू कसरी तयार पार्ने, ऋण असुलीका लागि विद्यमान कानुनी आधारहरू के–के हुन् र वित्तीय अनुशासन कायम राख्न कर्जा सूचना केन्द्र एवं कर्जा असुली न्यायाधिकरणको भूमिका कस्तो रहन्छ भन्ने विषयमा सहभागीहरूलाई स्पष्ट पार्नुभएको थियो । यसका साथै संस्थागत तहमा ऋण जोखिम न्यूनीकरणका लागि अपनाउनुपर्ने विभिन्न सुरक्षात्मक उपायहरूका बारेमा समेत उहाँले विशेष जोड दिनुभयो ।

। सहकारी संघ तथा नियामक निकायमा नियमित रूपमा पेश गर्नुपर्ने विवरण, प्रतिवेदन तथा अभिलेख व्यवस्थापनलाई व्यवस्थित र पारदर्शी बनाउने विषयमा समेत विस्तृत छलफल भएको थियो । तरलता व्यवस्थापन योजना, सम्भावित वित्तीय संकटबाट बच्ने रणनीति, संस्थागत स्थायित्व कायम गर्ने उपाय तथा सदस्यहरूको विश्वास अभिवृद्धि गर्ने विषयमा सहभागीहरूबीच सामूहिक प्रतिबद्धता व्यक्त भएको थियो ।

सहभागीहरूले यस्ता क्षमता अभिवृद्धिमूलक कार्यक्रमहरूले सहकारी क्षेत्रलाई थप व्यवस्थित, सुरक्षित तथा उत्तरदायी बनाउन महत्वपूर्ण योगदान पु¥याउने धारणा व्यक्त गर्दै कार्यशालाबाट प्राप्त सिकाइ तथा अनुभवलाई आफ्ना संस्थाहरूमा व्यवहारिक रूपमा कार्यान्वयन गर्ने प्रतिबद्धता समेत जनाएका छन् । 

कार्यशालाको सहजीकरण नेफ्स्कूनका कार्यक्रम अधिकृत महेश बरालले गर्नुभएको थियो भने नेफ्स्कून पर्सा सदस्य सेवा कार्यालयका बरिष्ठ सहायक  दिपेन्द्र साहले कार्यशालाको समग्र व्यवस्थापन गर्नुभएको थियो ।