झापा । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले मेचीनगर बचत तथा ऋण सहकारी संस्था लिमिटेड को स्थलगत सुपरिवेक्षण सम्पन्न गरेको छ ।

नेफ्स्कूनले सहकारी क्षेत्रको पारदर्शिता, उत्तरदायित्व तथा सदस्य हित सुनिश्चित गर्ने उद्देश्यले असार १ र २ गते मेचीनगर साकोसमा स्थलगत निरीक्षण तथा सुपरिवेक्षण गरेको हो । सुपरिवेक्षण संस्थामा कार्यान्वयन भइरहेको स्क्यान (SCAN) र प्रोबेसन (PROBATION) कार्यक्रम कार्यान्वयनको सन्दर्भमा गरिएको हो ।

धुलाबारी स्थित मुख्य कार्यालय तथा संस्थाको समग्र वित्तीय तथा व्यवस्थापकीय अवस्थाको अध्ययनका क्रममा बचत, ऋण, लेखापरीक्षण, लगानी, आर्थिक कारोबार, सदस्य सेवा–सुविधा, लाभांश वितरण तथा समावेशी सहभागिताका विषयमा समीक्षा गरिएको थियो । 

साथै, संस्थाभित्र रहेका सम्भावित जोखिम, व्यवस्थापकीय सुधारका क्षेत्र तथा प्रविधिमा आधारित सदस्य सूचना प्रणालीको प्रयोगबारे समेत मूल्यांकन गरिएको छ ।

झण्डै ६ हजार सदस्यको सहभागिता रहेको मेचीनगर साकोसले चार सेवा केन्द्रमार्फत करिब ६७ करोड रुपैयाँ बराबरको सम्पत्ति परिचालन गर्दै सदस्यहरूको वित्तीय आवश्यकता पूर्ति गर्दै आएको छ ।

नेफ्स्कूनका कार्यक्रम अधिकृत रामकृष्ण भट्टराई र प्राविधिक सहजकर्ता मिलन कोइरालाद्धारा भएको सुपरिवेक्षणमा मेचीनगर साकोसका सञ्चालक समिति, ऋण उपसमिति, उच्च व्यवस्थापन तथा कर्मचारीहरूको उपस्थिति रहेको थियो ।

सुपरिवेक्षणका क्रममा विनियम, नीति तथा आन्तरिक कार्यविधिको कार्यान्वयन, सम्पत्ति शुद्धीकरण निवारणसम्बन्धी नीति, नियामकीय निकायका निर्देशनहरूको पालना, भाखा नाघेको ऋण असुली, पुँजी पर्याप्तता अनुपात तथा संस्थाको समग्र वित्तीय अवस्थाबारे छलफल गरिएको थियो ।

सुपरिवेक्षणपछि प्राप्त सुझावहरूलाई संस्थागत सुधारको आधारका रूपमा ग्रहण गर्दै आगामी सञ्चालक समिति बैठकमा विस्तृत छलफल गरी कार्यान्वयनमा लैजाने निर्णय साकोसले गरेको छ ।