काठमाडौं, २३ भदौ । राष्ट्रिय सहकारी महासंघले कोभिड १९ को बढ्दो संक्रमणका समयमा सहकारीहरुमा सुरक्षित कार्यालय संचालन तथा सदस्य सेवा प्रवाहका विषयमा विज्ञहरुहरुसँग अन्तरक्रिया गरेको छ । सहकारी संघ संस्थामा आबद्ध कोही पनि कोभिड संक्रमित भएको अवस्थामा कसरी एकान्तबास बस्ने वा राख्ने विषयमा विषय विज्ञ चिकित्सकहरुसँग महासंघले अन्तरक्रिया गरेको हो । सो कार्यक्रममा संक्रमण रोग र हेरचार विज्ञ डा प्रभात अधिकारीले सर्तक भएर कोभिड १९ विरुद्धका नियमहरु पालना गर्नुपर्ने विषयमा परामर्श प्रदान गर्नुभएको थियो । उहाँले समुदायले नै रोगको रोकथाममा भूमिका खेलेमा महामारीको नियन्त्रण गर्न सकिने बताउनुभयो । उहाँले नाक, मुख र आँखाबाट भाइरस प्रत्यक्ष सर्ने भएकाले कार्यालयमा सम्पूर्ण कर्मचारी तथा सदस्यहरुले मास्क, पन्जा, चश्मा वा फेस सिल्ड लगाउनुका साथै कम्तिमा ६ फिटको भौतिक दूरी कायम गर्ने विषयमा सम्झौता गर्न नहुने सुझाव दिनुभयो । 

त्यसैगरी इन्टरनल मेडिसिन तथा स्वास्थ्य सेवा व्यवस्थापन विज्ञ डा विनोद ढुंगानाले पैसाको कारोबार गर्ने संघ संस्थाका कर्मचारीले पैसा चलाउनु अघि र पछि नियमित हात धुनेलगायतका सुरक्षा सावधानी अपनाउनुर्पे बताउनुभयो । अमेरिकाबाट भर्चुअल जोडिनुभएका डा. ढुंगानाले संक्रमण नियन्त्रण र एकान्तबासका लागि समेत चिकित्सकको नियमित परामर्श लिदाँ जोखिम न्यूनीकरण गर्न सकिने उल्लेख गर्नुभयो । 

 संक्रमण नियन्त्रण विज्ञ नर्स समिक्षा कोइरालाले निम्नउल्लेखित नियमहरु अनुसरण गरेर कार्यालय संचालन गर्न अनुरोध गर्नुभयो ।

• सबै कर्मचारीको टेबलमा अनिवार्य स्यानिटाइजर राख्ने
•  कार्यालय छिर्ने स्थानमा सबैले सहज पुग्ने गरी स्यानिटाइजर राख्ने ।
•  नगदलाई २४ घन्टा क्वारेन्टाइनमा राखेर मात्र प्रयोग गर्ने । 
• पैसा वा कागजात प्रयोग गर्ने बित्तिकै स्यानिटाइजर प्रयोग गर्ने । पैसा वा कागजपत्र थुक लगाएर नपल्टाउन । 
•  आलोपालो कर्मचारी परिचालन गर्ने ।
• नियमित प्रयोग गर्ने सामना सबै कर्मचारीको छुट्टाछुट्टै व्यवस्था गर्ने ।
• कार्यालय भित्र छुट्टै जुत्ता÷चप्पल प्रयोग गर्ने ।
• सदस्यको सुरक्षा प्रबन्ध पनि माथि उल्लेखभए अनुरुप गर्ने ।
• दिनमा एक पटक कार्यालमा निर्मलीकरण गर्ने । 
• दुई व्यक्तिबीच कम्तिमा ६ फिटको दुरी कायम गर्ने । 

 कार्यक्रमको भर्चुअल उद्घाटन गर्दै महासंघका अध्यक्ष मीनराज कँडेलले सहकारी संघ÷संस्था खोल्दा अपनाउनुपर्ने सुरक्षा विधि र संक्रमित सदस्यलाई घरमै राखेर स्वस्थ्य बनाउने प्रक्रियाका विषयमा महत्वपूर्ण प्रस्तुति भएको बताउँनुभयो । ‘सहकारी संघ संस्थाहरुमा उठेका धेरै प्रश्नको उत्तर यो कार्यक्रमले दिएको छ । आगामी दिनमा पनि यस्ता कार्यक्रम संचालन गर्दै जाने छौं,’ उहाँले भन्नुभयो । महासंघका वरिष्ठ उपाध्यक्ष तथा अन्तर्राष्ट्रिय सहकारी महासंघका ग्लोबल बोर्ड सदस्य ओमदेवी मल्लले समुदायसँग प्रत्यक्ष सरोकार राख्ने सहकारी संघ÷संस्थाका लागि कोभिड १९ मा सुरक्षाका विधि अपनाएर सेवा प्रवाह गर्नुपर्ने आवश्यकता महसुस गरेर कार्यक्रमको आयोजना गरिएको र यो निकै प्रभावकारी भएको बताउनुभयो । कार्यक्रममा महासंघका संचालकहरु तथा महाप्रबन्धक चित्राकुमारी थाम्सुहाङ सुब्बाको उपस्थिति थियो ।