धादिङ । नेफ्स्कूनका कोषाध्यक्ष एवम् धादिङ फिल्ड व्यवस्थापन उप समितिका संयोजक दिपक पनेरुले केन्द्रबाट तय भएका बार्षिक लक्ष्यका साथै स्थानीय आवश्यकता मध्यनजर गरी हरेक महिना सम्भावित कार्यक्रम आवश्यकता औल्याउनुभएको छ । आज धादिङ मा आयोजित फिल्ड व्यवस्थापन उप समिति बैठकमा बोल्दै उहाँले नेफ्स्कून, जिल्ला बचत संघ र स्थानीय सरकारका जिल्ला समन्वय समितिका पदाधिकारीहरुसँगआगामी महिना बैठक आयोजना गरी बृहत कार्यक्रम सञ्चालन सम्बन्धमा जानकारी गराउनुभयो । साथै नेफ्स्कून र जिल्ला बचत संघ साझेदारीका निर्धारित कार्यक्रमहरुलाई निरन्तरता दिने, तालिम तथा व्यवसाय प्रवर्द्धन कार्यक्रमलाई तिब्रताका साथ अघि बढाउने, बार्षिक योजना र लक्ष्य हासिलको अग्रसरता र नियमित साकोसहरुसँगको समन्वय आवश्यक भएको बताउनुभएको छ । 

बैठकमा त्रैमासिक रुपमा फिल्ड कार्यालयले हासिल गरेको प्रगतिको समीक्षा, ऋण लगानी, वार्षिक लक्ष्यको समीक्षा एवम् माघ महिनामा सञ्चालन गरिने कार्याक्रमको बारेमा छलफल भएको थियो । बैठकमा फिल्ड कार्यालय व्यवस्थापन उप समिति सदस्य प्रदिप अधिकारी, देव प्रसाद त्रिपाठी, टापबहादुर श्रेष्ठ लगायतले ऋण लगानी बृद्धि, सदस्य वृद्धि साथै व्यवसाय प्रवर्द्धनका लागि साझेदारी कार्यक्रम सञ्चालन समन्वयमा सबैको साथ सहयोग आवश्यक हुने धारणा राख्नुभएको थियो ।
  
समितिका सदस्यहरुमा प्रदिप अधिकारी, तुलसी प्रसाद अधिकारी, गणेश श्रेष्ठ, देव प्रसाद त्रिपाठी र टाप बहादुर श्रेष्ठ हुनुहुन्छ । बैठक व्यवस्थापन नेफ्स्कून फिल्ड कार्यालय धादिङका इन्चार्ज शम्भु प्रसाद घिमिरेले गर्नुभएको थियो ।