काठमाडौं । नेफ्स्कून-कास्कून साझेदारी कार्यक्रम अन्तर्गत आयोजित २ दिने 'बजार प्रतिनिधिहरुको क्षमता विकास तालिम' आज सम्पन्न भएको छ । कास्कूनले रणनीतिक लक्ष्य अनुरुप आफ्ना सदस्य संस्थाहरुलाई विभिन्न किसिमका तालिमहरु प्रदान गर्दै आएको छ । जिल्ला संघ साझेदारी कार्यक्रम अन्तर्गत कास्कूनले मझौला किसिमका तालिमहरुलाई पछिल्लो समय तीब्र रुपमा सञ्चालन गर्दै आएको छ । कास्कूनको आयोजना रहेको २ दिने तालिमको सहजिकरण संघका व्यवस्थापक अरुण कुमार तिवारीले गर्नुभएको थियो ।

तालिममा काठमाडौं जिल्लास्थित विभिन्न बचत तथा ऋण सहकारीका ३४ बजार प्रतिनिधिहरुको सहभागिता थियो । आजको समापन कार्यक्रमका प्रमुख अतिथि कास्कूनका सचिव सालिकराम पुडासैनीले सहभागीहरुलाई प्रमाणपत्र वितरण गर्दै तालिमबाट प्राप्त शिक्षालाई व्यवहारिक परिणति प्रदान गर्नुपर्ने बताउनुभयो । उहाँले सबै साकोसहरुले सदस्यमैत्री व्यहार गर्ने, सदस्यहरुसँग मात्र कारोबार गर्ने, रणनीतिक व्यावसायिक योजना निर्माण गरी निर्दिष्ट योजना र लक्ष्य अनुरुप काम गर्ने र सदस्यहरुसँग नियमित सम्पर्क कायम गरी हरेक किसिमका वित्तीय र गैर वित्तीय समस्या समाधानमा प्रभावकारी भूमिका निर्वाह गर्नुपर्नेमा सहभागीहरुको ध्यानाकर्षण गराउनुभयो । समापन कार्यक्रम सञ्चालन कास्कून कलंकी सेवा कार्यालय प्रमुख लव सिंखडाले गर्नुभएको थियो ।