काठमाडौं । बाबियाखर्क बचत तथा ऋण सहकारी संस्था लि ले  सञ्चालक समिति, लेखा सुपरिवेक्षण समिति तथा विभिन्न उपसमितिहरुका लागि एक दिने अभिमुखीकरण कार्यक्रम आयोजना गरेको छ ।अभिमुखीकरण कार्यक्रममा सबै समितिहरुको काम कर्तव्य, अधिकार, दायित्वका साथै सहकारी र बचत ऋण सहकारी अभियानका विविध पक्षहरुका बारेमा सहजीकरण गरिएको थियो । कार्यक्रमको उद्घाटन सत्रको अध्यक्षता नेफ्स्कूनका पूर्व अध्यक्ष एवम् साकोसका अध्यक्ष ऋषिराज घिमिरेले गर्नुभएको थियो भने प्रमुख अतिथि राष्ट्रिय सहकारी महासंघका अध्यक्ष मिनराज कडेल रहनुभएको थियो ।

प्रमुख अतिथि कडेलले एशियाली ऋण महासंघका समेत अध्यक्ष भइसक्नुभएको ऋषिराज घिमिरे बाबियाखर्क साकोसको अध्यक्ष रहुनभएकाले उहाँको नेतृत्वमा संस्थाले थप प्रगति हासिल गर्ने विश्वास व्यक्त गर्नुभयो । उहाँले सहकारीहरुले सुशासनमा बिशेष ध्यान दिनुपर्ने बताउँदै प्रविधिकरणमार्फत सदस्यहरुलाई सहज र विश्वसनीय सेवा प्रवाह समयको माग भएकोमा बिशेष जोड दिनुपर्ने । ‘मर्यादित र प्रविधिमैत्री हुनैपर्छ, अन्यथा सदस्यको विश्वास जित्न अब कठिन हुन्छ,’ नेफ्स्कूनमा बाबियाखर्कका अध्यक्षसँगै काम गर्नुभएका कडेलले भन्नुभयो, ‘सहकारी संस्थाम पद भनेको मानका लागि भन्दा पनि जिम्मेवारी बहनका लागि हो । यो हामी सबैले बुझ्नुपर्छ ।’ बाबियाखर्कको नयाँ सञ्चालक समितिको कामको मुल्याङ्कन ४ वर्षपछि हुने भन्दै यो कार्यकालमा संस्थालाई थप उचाईमा पुर्याउने कामका लागि शुभकामना व्यक्त गर्नुभयो ।

 व्यक्तिगत तवरमा पनि कडेल र घिमिरेबीच घनिष्ठ सम्बन्ध रहँदै आएको छ । जसलाई सम्बोधनका क्रममा बाबियाखर्कका अध्यक्ष घिमिरेले पनि उल्लेख गर्नुभयो,‘ हामी दुईको वेबलेन्थ मिल्छ ।’ उहाँले संस्थालाई थप विश्वसनीय बनाउन सबै समिति उपसमितिहरुको महत्वपूर्ण भूमिका हुने भएकाले आवश्यक नीतिगत निर्णयहरु समयमै र सही गर्नेमा आश्वस्त तुल्याउनुभयोे । अध्यक्ष घिमिरेले सहकारी क्षेत्रको आफ्नो लामो अनुभवलाई बाबियाखर्कको उन्नति र प्रगतिमा लगाउने प्रतिबद्धता व्यक्त गर्दै सदस्यता विस्तार, सेवा केन्द्र विस्तार, एकीकरण, प्रविधिकरण जस्ता विषयमा रणनीतिक योजनाको रिभ्यू गर्दै त्यसैमा टेकेर अघि बढिने स्पष्ट पार्नुभयो ।

उहाँले अंग्रेजी नयाँ वर्षको पहिलो दिनमै अभिमुखीकरण कार्यक्रम राखिएको भन्दै यसले पनि सुरुवातबाटै कामप्रति लाग्न अभिप्रेरित गर्ने विश्वास व्यक्त गर्नुभयो । उद्घाटन सत्र साकोसका व्यवस्थापक बल्देव कुमार पौड्यालले सञ्चालन गर्नुभएको थियो भने अभिमुखीकरण कार्यक्रम सहजीकरण नेफ्स्कूनका बरिष्ठ कार्यक्रम अधिकृत प्रेमनाथ वाग्लेले गर्नुभएको थियो । कार्यक्रममा संस्थाको व्यवस्थापनको पनि सहभागिता थियो ।