सिन्धुली । जिल्लाको खुर्कोटमा रहेको जनजागरण महिला बचत तथा ऋण सहकारी संस्था लि. आफ्नै नवनिर्मित दुई कोठे भवनमा सरेको छ । 

२०६७ सालमा स्थापित उक्त साकोसको कुल कारोबार ५ करोड रहेको छ । विगत ११ बर्षदेखि कोठा भाडामा लिएर सञ्चालनमा रहेको साकोसको कार्यालय आफ्नै भवनमा सार्न पाउँदा निकै खुसी लागेको छ,  साकोसकी अध्यक्ष चन्द्रकला देवकोटाले भन्नुभयो, “४ लाख रुपैंया गोलन्जोर गाउँपालिका वडा नं. ७ खुर्कोटबाट, ३ लाख रुपैंया गोलन्जोर गाउँपालिकाबाट र सहकारीको आफ्नो लगानी रु. २५ हजार गरी कुल जम्मा ७ लाख २५ हजारमा २ कोठे साकोस भवन निर्माण सम्पन्न भएको हो ।”

साकोसकी अध्यक्ष देवकोटाको अध्यक्षतमा आयोजित भवन उद्घाटन समारोहकी प्रमुख अतिथि गोलन्जोर गाउँपालिकाकी अध्यक्ष गंगादेवी श्रेष्ठले बुधबार नवनिर्मित भवनको उद्घाटन गर्नुभएको थियो । भवन उद्घाटनका क्रममा प्रमुख अतिथि श्रेष्ठले व्यक्तिगत रुपमा कार्यालयका लागि २ वटा फ्यान (पंखा) उपलब्ध गराउने वचनबद्धता समेत व्यक्त गर्नुभएको थियो । उहाँले गाउँपालिकाको अध्यक्षको कार्यकाल समाप्त भएपनि जीवनरहेसम्म जनजागरण साकोसलाई आवश्यक सहयोग र सल्लाह सुझाव प्रदान गरिनैरहने प्रतिवद्धता व्यक्त गर्नुभएको थियो । 

कार्यक्रममा सहभागी वक्ताहरुले जनजागरण साकोसले समुदायमा सहकारी शिक्षा, वित्तीय साक्षरता, जनचेतना अभिवृद्धि साथै सदस्यहरुको आयआर्जन र जीवनस्तर सुधारका क्षेत्रमा महत्वपूर्ण काम गर्दै आइरहेको बताएका थिए । कार्यक्रममा गोलन्जोर गाउँपालिकाका निवर्तमान अध्यक्ष पुष्प कार्की, भिमज्योति क्याम्पस खुर्कोटका प्रमुख यज्ञ राई, नेक्सस साकोसका अध्यक्ष नवराज श्रेष्ठ, समाजसेवी ज्वाला प्रसाद न्यौपाने पुकार र सहकारी सल्लाहकार रन्जना कार्कीले आ आफ्नो  क्षेत्र र तहबाट सहकारीको लागि निरन्तर साथ दिने प्रतिबद्धता जनाउनुभएको थियो । 

सिन्धुली जिल्ला बचत तथा ऋण सहकारी संघका कार्यक्रम अधिकृत शारदा पहाडीले सहकारी संस्थाका सवल पक्ष र सुधार गर्नुपर्ने पक्षहरुको विषयमा चर्चा गर्दै आगामी दिनमा संस्थागत विकास र सदस्य सेवा विस्तारमा गर्नुपर्ने कार्यहरुका सम्बन्धमा सुझाउनुभएको थियो । 

कार्यक्रम सञ्चालन संस्थाका व्यवस्थापक नम्रता राई  र स्वागत कोषाध्यक्ष  इन्दिरा थापाले गर्नुभएको थियो ।