गैंडाकोट । विकू बचत तथा ऋण सहकारी संस्थाले नेपाल वित्तीय प्रतिवेदनमान (एनएफआरएस) ढाँचामा वित्तीय विवरण तयार गर्नेगरी प्रक्रिया  थालनी गरेको छ । यसै आर्थिक बर्षदेखि साकोसले आफ्ना सम्पूर्ण वित्तीय विवरण तथा विश्लेषण नेपाल वित्तीय प्रतिवेदन मान मार्फत राखिने जानकारी गराएको छ ।

सोही क्रममा साकोसले आफ्ना कर्मचारीहरुको क्षमता तथा व्यावसायिकता विकासको लागि तालिम सम्पन्न गरेको छ । आफ्नो वित्तीय विश्लेषण नेपाल वित्तीय प्रतिवेदनमान मार्फत गर्ने भएकाले संस्थाले विभागीय प्रमुखहरु, क्षेत्रीय प्रमुखहरु र सेवा केन्द्र प्रमुखहरुलाई तालिमको आयोजना गरेको जनाएको छ ।

तालिमको संयोजकत्व साकोसका अध्यक्ष ओम प्रसाद सापकोटाले गर्नुभएको थियो भने स्वागत मन्तव्य संस्थाका सचिव प्रेम प्रसाद सापकोटाले राख्नु भएको थियो ।

कार्यक्रममा साकोसका प्रमुख कार्यकारी अधिकृत माधव प्रसाद पौडेलले सहजिकरण गर्नु भएको थियो भने तालिम वरिष्ठ चार्टर्ड एकाउन्टेन्ट्स अनिल जोशी, प्रल्हाद गौतम, नर बहादुर रोकाय र मिलन रुम्बाले दिनु भएको थियो ।