स्याङ्जा । जिल्लामा सञ्चालित बचत तथा ऋण सहकारी संस्थाहरुबीच सहकारीका समसामयिक विषयमा छलफल तथा अन्तरक्रिया सम्पन्न भएको छ । असोज २९ गते शनिबार आयोजित कार्यक्रमको अध्यक्षता जिल्ला बचत संघका अध्यक्ष रविन्द्र प्रसाद श्रेष्ठले गर्नुभएको थियो । 

कार्यक्रमको प्रमुख आतिथ्यता नेफ्स्कूनका अध्यक्ष परितोष पौड्याल र विशिष्ट अतिथिहरुमा नेफ्स्कूनकी सञ्चालक कमलादेवी गिरी, जिल्ला सहकारी संघका अध्यक्ष लक्ष्मीपति पौड्याल, जिल्ला बचत संघका संरक्षक अनन्त कुमार श्रेष्ठ,भूमिजंग केसी, पुतलीबजार नगरपालिकाका सहकारी विभाग प्रमुख विष्णु प्रसाद ढकाल, अथितिहरुमा पुष्पा क्षेत्री, टिकाराम अधिकारी लगायत जिल्ला भरका बचत तथा ऋण सहकारी संस्थाका सञ्चालक एवं व्यवस्थापकहरुको उपस्थिति रहेको थियो । 

कार्यक्रममा प्रमुख अतिथि पौड्यालले अहिलेको विषम परिस्थितिमा सहकारीले तरलता व्यवस्थापनमा ध्यान दिँदै सदस्यको बचतको सुरक्षामा लाग्नुपर्ने बताउनुभयो । सहकारीले नीति, विधि प्रविधिमा जोड दिँदै उच्च प्रविधिको अवलम्बन साथै अभियानको विकास र संरक्षणमा सहकारीको साथ सहयोगको आवश्यकताबारे चर्चा गर्नुभयो । बचत तथा ऋण सहकारी अभियानको प्रवर्धन र विकासका लागि नेफ्स्कून जस्तो सुकै सहयोग गर्न तयार रहेको उहाँले बताउनुभयो । 

कार्यक्रमका सहभागी बक्ताहरुले सहकारीका समसामयिक विषयहरुमा आफ्नो विचार राख्नुभएको थियो । कार्यक्रमको सञ्चालन जिल्ला बचत संघका सचिव अच्यूत प्रसाद पोखरेलले गर्नुभएको थियो ।