काठमाडौं । सुर्योदय बचत तथा ऋण सहकारी संस्था लि., स्याङ्जाको २१औं वार्षिक साधारणसभा सम्पन्न भएको छ । साकोसका अध्यक्ष हुम बहादुर कुमालको अध्यक्षतामा आयोजित सभाको उद्घाटन प्रमुख अतिथि नेफ्स्कूनका अध्यक्ष परितोष पौड्यालले गर्नुभएको थियो । 

२०५५ साल पौष २५ गते स्थापना भएको सुर्योदय साकोसले स्याङ्जा जिल्लाभर कार्यक्षेत्र राखी ९ हजार १ सय ६९ शेयर सदस्यहरुलाई वित्तीय तथा गैरवित्तीय सेवा उपलब्ध गराउँदै आएको छ । 

साकोसका सचिव राजेन्द्र प्रसाद शर्माले बार्षिक प्रगति प्रतिवेदन प्रस्तुत गर्दै साकोसले गत आ.व.मा गरेका उल्लेखनीय कामहरु र आगामी आ.व.का कार्यक्रमहरुबारे जानकारी गराउनुभयो । 

कोषाध्यक्ष राममाया अधिकारीले आर्थिक प्रतिवेदन प्रस्तुत गर्दै साकोसले रु. ४८ करोड १६ लाख ३८ हजार ५६३ बचत संकलन गरेको र ५४ करोड ६० लाख ६३ हजार ५८ रुपैंया ऋण लगानी गरी गत आ.व.मा साकोसले ३ करोड ८ लाख ५६ हजार ६७७ रुपैंया कुल सञ्चालन मुनाफा आर्जन गर्न सफल भएको जानकारी गराउनुभयो । साकोसको कुल वासलात ६६ करोड ९७ लाख ३५ हजार ७३१ रुपैंया रहेको प्रतिवेदन मार्फत प्रस्तुत गरिएको थियो ।

५ करोड २८ लाख २२ हजार संस्थागत कोष रहेको साकोसले सदस्यहरुलाई बचत तर्फ ६ दशमलब १२ प्रतिशत र ऋण तर्फ ५ दशमलव ०८ प्रतिशत संरक्षित पुजी फिर्ता कोष उपलब्ध गराइने जनाएको छ भने सदस्यहरुका लागि १५ दशमलव ८० प्रतिशत शेयर लाभाश प्रस्ताव साधारणसभा मार्फत पारित गरेको छ । साकोलले कुल १ हजार ७ सय ९३ सदस्यमा ऋण प्रवाह गरेको छ । 

साधारणसभाका प्रमुख अतिथि नेफ्स्कूनका अध्यक्ष पौड्यालले सुर्योदय साकोसले गरेको प्रगति प्रशंसनीय रहेको बताउँदै दिगो र संस्थागत साकोस विकासका लागि स्तरीकरण कार्यक्रम र उच्चस्तरीय प्रविधि विकासको अपरिहार्यताको चर्चा गर्नुभयो । उहाँले समृद्ध सदस्यनै दिगो साकोस विकासको आधार भएकोले सदस्य हितका कार्यक्रम तथा सदस्य सेवालाई केन्द्रविन्दुमा राखेर काम गर्नुपर्ने बताउनुभयो । 

साधारणसभाका अर्का विशेष अतिथि नेफ्स्कूनका सञ्चालक कमलादेवी गिरीले साकोसमा विविध खालका सदस्यहरु रहने भएकोले सदस्यको आवश्यकता र प्राथमिकतालाई बुझेर व्यवहार गर्नुपर्ने साकोसको कर्तव्य रहेको बताउनुभयो । सभामा जिल्ला सहकारी विभागका प्रतिनिधि, जिल्ला बचत संघका अध्यक्ष रविन्द्र प्रसाद श्रेष्ठ, स्थानीय सहकारीकर्मीहरु लगायतको विशेष उपस्थिति रहेको थियो । 

जिल्लाभर ५ सेवा केन्द्र सञ्चालनमा रहेको सुर्योदय साकोसमा २७ कर्मचारी कार्यरत छन् । साकोसमा १ हजार ९ सय ७६ जना बालबचतकर्ताले नियमित बचत गर्दै आइरहेको व्यवस्थापक धु्रव नारायण श्रेष्ठले जानकारी गराउनुभयो ।