काठमाडौं । काभ्रेको बनेपा नगरपालिका–७ मा रहेको चण्डेश्वरी बचत तथा ऋण सहकारी संस्था लि.को सञ्चालकहरुको क्षमता अभिवृद्धि तालिम (सियुडिसिसि) पौष १५ गते सम्पन्न भएको छ । चार दिवसीय उक्त तालिम चितवनको सौराहामा पौष १२ गतेदेखि सञ्चालन भएको थियो । तालिममा साकोसका सञ्चालक समिति, लेखा सुपरिवेक्षण समिति, उपसमिति र  कर्मचारी गरी १४ जनाको सहभागिता थियो । 

तालिम साकोसका अध्यक्ष नवीन भक्त बादे श्रेष्ठको अध्यक्षता र नेफ्स्कूनकी उपाध्यक्ष शान्ति अधिकारीको प्रमुख आतिथ्यतमा सम्पन्न भएको थियो ।

 
तालिमको सहजीकरण नेफ्स्कूनका सदस्य विभाग प्रमुख गणेश प्रसाद तिमिल्सिना र तालिम अधिकृत रवीन्द्र श्रेष्ठले गर्नुभएको थियो ।

चण्डेश्वरी साकोस यस वर्षको एशियाली स्तरको स्तरीकरण कार्यक्रम अन्तर्गत ब्रोञ्ज ब्राण्ड प्राप्त साकोस हो । गत पौष ८ गते सम्पन्न नेफ्स्कूनको ३१औं वार्षिक साधारणसभाका अवसरमा साकोसले ब्रोञ्ज ब्राण्ड ग्रहण गरेको थियो । त्यसैगरी नेफ्स्कून प्रदेशस्तरीय उत्कृष्ट साकोसबाट पनि चण्डेश्वरीलाई पुरष्कृत भएको थियो । 

कुल ८ हजार ४८० शेयर सदस्य रहेको चण्डेश्वरी साकोसको करिब १ अर्ब १७ करोड ६८ लाखको वासलात छ ।