बर्दिया । सहकारीका व्यवस्थापन समूह, लेखा समूह तथा सञ्चालकहरुलाई लक्षित गरी सम्पत्ती दायित्व व्यवस्थापन तालिम बर्दियाको भुरीगाउँमा सञ्चालन भएको छ । राष्ट्रिय सहकारी बैंक लिमिटेड भुरीगाउँ शाखाको आयोजनामा सञ्चालित दुई दिने तालिमको उद्घाटन नेफ्स्कूनका महासचिव दामोदर अधिकारीले गर्नुभएको थियो । 

तालिम उद्घाटन सत्रलाई सम्बोधन गर्दै प्रमुख अतथि नेफ्स्कूनका महासचिव अधिकारीले समसामयिक विषयवस्तुको छनौट गर्दै तालिमको आयोजना गरी सहकारीको क्षमता अभिवृद्धिमा सहयोग पुर्याएकोमा राष्ट्रिय सहकारी बैंक लिमिटेडलाई धन्यवाद दिनुभयो । सहकारी आफ्ना मूल्य तथा मान्यताका आधारमा सञ्चालन हुनुपर्ने बताउँदै सामुदायिक हकहितको लागि सहकारी निरन्तर लाग्नुपर्नेमा उहाँको जोड थियो । 

सहकारीले सदस्यलाई ग्राहकको रुपमा नभई सहकारीको मालिकको रुपमा व्यवहार गर्नुपर्ने र सहकारी सदस्य केन्द्रित भएर सञ्चालन हुनुपर्ने उहाँले बताउनुभयो । नीति–नियम भन्दा बाहिर गएर सहकारीले कार्यक्रमहरु सञ्चालन गर्नाले नै सहकारी क्षेत्र धरापमा परेको बताउँदै महासचिव अधिकारीले वर्तमान समयमा सहकारीमा देखा परेका विचलनका बीच सम्पत्ती दायित्व व्यवस्थापन तालिम परिणाममुखी हुनेमा आशा व्यक्त गर्नुभयो । उहाँले सहकारी सञ्चालन गर्दा सञ्चालक तथा कर्मचारीले संस्थागत सुशासनमा ख्याल राख्दै समुदाय केन्द्रित र सदस्य केन्द्रित भएर सहकारी निर्माणमा जोड दिनुपर्ने बताउनुभयो । 

दुई दिनसम्म संचालन हुने तालिममा सम्पत्ति दायित्व व्यवस्थापनका विषयमा जानकारी गराउँदै सहकारी संस्थाको गुणस्तरीय वित्तिय संरचना, कोष लागत निर्धारण तथा प्रभाबकारी तरलता व्यवस्थापन सम्बन्धी विषयमा प्रशिक्षण दिइने राष्ट्रिय सहकारी बैंक लिमिटेड भुरीगाउँ शाखाका प्रमुख किरण खत्रीले जानकारी दिनुभयो ।

जिल्ला बचत तथा ऋण सहकारी संघ बर्दियाका अध्यक्ष नवराज न्यौपानेले सहकारीमा तरलताको अभावले सहकारीहरु समस्यामा परि रहेको बताउँदै सहकारीको अभियान मार्फत् समुदायमा जागरुकता ल्याउनु पर्ने बताउनु भयो । सञ्चालित सम्पत्ती दायित्व व्यवस्थापन तालिमले सहकारीमा आउने समस्याहरुलाई कसरी व्यवस्थापन गर्ने भन्ने विषयमा निर्णय लिन सक्षम बनाउनेमा आफु विश्वस्त रहेको न्यौपानेले बताउनुभयो ।

राष्ट्रिय सहकारी बैंक समन्वय उप–समिति सदस्य जनार्दन योगीले  तालिममा सिकेका कुराहरुलाई सहकारीमा लागु गर्न सम्पूर्ण सहभागी सहकारीकर्मीहरुलाई अनुरोध गर्नुभयो ।

तालिममा ठाकुरबाबा र मधुवन नगरपालिकाका विभिन्न सहकारी संस्थाहरुबाट व्यवस्थापन समूह, लेखा समूह तथा सञ्चालकहरु गरी ३४ जनाको सहभागिता रहेको छ । आइतबार र सोमबार दुई दिन सञ्चालन हुने तालिमको सहजीकरण बैंकका तालिम अधिकृत बल्लभ तिमिल्सेनाले गर्नुभएको छ ।