घोराही, दाङ । सहकारी संस्था सञ्चालनका लाागि नीति तथा कार्यविधि एकदमै महत्वपूर्ण आवश्यकता हो । संस्था सञ्चालन नीति तथा कार्यविधिको आधारमा हुनुपर्छ भन्ने विषयमा कसैको पनि दुइमत हुँदैन । सहकारी संस्थामा नेतृत्वको व्यक्तिगत तजबिजीभन्दा सामूहिकताको आधारमा गरिने निर्णयहरुलाई नीतिगत रुप प्रदान गर्ने तथा आवश्यक आन्तरिक कार्यविधि निर्माण गरी काम गर्दा त्यसले रणनीतिक लक्ष्यहरु हासिल गर्न मद्दत गर्दछ । यस्तो, नीति तथा कार्यविधिहरु के कसरी र कहिले तयार गरिन्छ, यसका तौरतरिका के छन्, भन्ने जान्नु अत्यावश्यक छ । 

अर्को भनेको, सञ्चालक समिति तथा विभिन्न उपसमिति लगायतका बैठकका समग्र विषयवस्तुसहित वैधता तथा आधिकारिताका लागि उपस्थित सबैले प्रमाणित गरी अभिलेखाङ्कन गर्ने लिखित अभिव्यक्तिलाई माइन्यूट भनिन्छ । यो माइन्यूट के कसरी लेखिन्छ यसका स्थापित विधिहरु के छन्, यसका अन्य महत्व र विशेषता आदिबारे पनि सहकारी संस्था जानकार हुनुपर्दछ ।

यीनै विषयमा नेफ्स्कून सदस्य सेवा कार्यालय दाङको आयोजनामा दुई दिवसीय तालिम सञ्चालन गरिएको छ । २०८० माघ १८ र १९ गते घोराहीमा सम्पन्न तालिममा बिभिन्न २५ बचत तथा ऋण सहकारी संस्थाका ३६ जनाको सहभागिता थियो ।  

तालिममा नीति तथा आन्तरिक कार्यविधि निर्माण प्रकृया समावेश हुनपर्ने बिषयवस्तु, उद्देश्य, तिनको ब्याख्याका विषयमा समूह छलफल, समूह अभ्यासमार्फत सहभागीहरुलाई प्रष्ट पारिएको थियो । त्यसैगरी, संस्था सञ्चालनका लागि प्रभावकारी बैठक सञ्चालन प्रकृया साथै नीतिगत निर्णय लेखनमा उल्लेख हुनपर्ने बिषयवस्तुमा समूह छलफल गरि बुझाइमा एकरुपता कायम गरिएको थियो । 

तालिमका सहभागीहरुले बिषयवस्तु समय सान्दर्भिक भएको र साकोस सञ्चालनका आधारभूत कुराहरु सिक्न पाइएको भन्दै तालिममा सिकेका कुरा साकोसमा व्यवहारमा ल्याउने प्रतिबद्धता व्यक्त गर्नुभएको थियो । सहभागीहरुले तालिमले मसिनादेखि महत्वपूर्ण धेरै विषयमा स्पष्ट हुने अवसर प्रदान गरेको भन्दै खुसी व्यक्त गर्नुभएको थियो ।

तालिम समापनमा जिल्ला बचत तथा ऋण सहकारी संघ लि. दाङका अध्यक्ष बिमल अधिकारीले सहकारीलाई सफल रुपमा संञ्चालन गर्न नीति, आन्तरिक कार्यविधि निर्माण तथा तिनको समय सापेक्ष संशोधन आवश्यक भएको बताउनुभयो ।  उद्घाटन कार्यक्रममा संघको सदस्य सेवा कार्यालयका दाङका निवर्तमान सदस्य भरत बुढाथोकी सहभागी भई सबैलाई उत्प्रेरित गर्नुभएको थियो ।

तालिम सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको थियो भने उद्घाटन तथा समापन कार्यक्रम सञ्चालनसँगै समग्र कार्यक्रमको व्यवस्थापन नेफ्स्कूनको सदस्य सेवा कार्यालय दाङका ईन्चार्ज बिष्णुदत्त जोशीले गर्नुभएको थियो । व्यवस्थापन सहयोग कार्यालय सहायक दिनेश महराले गनुभएको थियो ।