बर्दिया । नेपाल बचत तथा ऋण केन्द्रीय सहकारी संघ लिमिटेड (नेफ्‌स्कून) ले बारबर्दिया न.पा. ६, बर्दिया स्थित श्री विपन्‍नता मुक्ति स्वाबलम्बन विकास बचत तथा ऋण सहकारी संस्था लिमिटेड संग नियमित निरीक्षण अनुगमन कार्यक्रम (स्क्यान) को सम्झौता मंसिर २६ गते सम्पन्न भएको छ । बर्दिया जिल्लामा स्क्यान सम्झौता गर्ने पहिलो सहकारी संस्था विपन्नता मुक्ति स्वावलम्बन साकोस बनेको छ।

सहकारी ऐन २०७४ को व्यवस्था बमोजिम संघद्धारा यो कार्यक्रमको शुरुवात गरिएको थियो । संघको ३८ औं स्थापना दिवसको दिन सार्वजनिक भएको नियमित निरिक्षण तथा अनुगमन कार्यक्रम (स्क्यान) ले संघका सबै सदस्य संघ संस्थाहरुलाई अनुगमन तथा निरिक्षण गरी आवश्यक मार्गदर्शन प्रदान गर्ने उद्देश्य राखेको छ ।

श्री विपन्‍नता मुक्ति स्वाबलम्बन विकास बचत तथा ऋण सहकारी सस्थां लिमिटेडका उपाध्यक्ष नमलाल रेग्मी, कोषाध्यक्ष केशवराज पौडेल, लेखा समिति संयोजक लेखनाथ भुसाल, प्रबन्धक प्रेम गिरी र नेफ्‌स्कूनका कार्यक्रम अधिकृत प्रविण अधिकारी, अनुगमन सहजकर्ता प्रकाश लुहारको रोहबरमा प्रथम पक्ष, संघको तर्फबाट संघका सहायक प्रमुख कार्यकारी अधिकृत दुर्गा प्रसाद ढकाल र दोस्रो पक्ष साकोसको तर्फबाट साकोसका अध्यक्ष शोभाखर उपाध्यायको हस्ताक्षरमा सम्झौता सम्पन्न भएको थियो ।