मोरङ — नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी क्षेत्रमा सुशासन, दिगोपन र वित्तीय अनुशासन प्रवर्द्धन गर्ने उद्देश्यसहित नियमित स्थलगत सुपरिवेक्षण कार्यलाई निरन्तरता दिएको छ।

यसैक्रममा नेफ्स्कूनले नियमित निरीक्षण तथा अनुगमन कार्यक्रम अन्तर्गत महिला उत्थान बचत तथा ऋण सहकारी संस्था लिमिटेड, उर्लाबारी, मोरङको स्थलगत सुपरिवेक्षण पौष १८ गते सम्पन्न गरेको छ।

सुपरिवेक्षणको मुख्य उद्देश्य सहकारी संस्थाहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु तथा बचतकर्तामा विश्वास अभिवृद्धि गर्नु रहेको  छ।

निरीक्षणका क्रममा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षा व्यवस्था, केवाईसी अद्यावधिक, सम्पत्ति शुद्धिकरण निवारण नीति (AML/CFT) तथा भाखा नाघेका ऋण असुलीसम्बन्धी विषयहरूको मूल्यांकन गरिएको थियो।

सुपरिवेक्षण कार्यक्रममा नेफ्स्कूनका तर्फबाट कार्यक्रम अधिकृत महेश वरालको उपस्थिति रहेको थियो भने संस्थाको तर्फबाट सञ्चालक समितिका अध्यक्ष, सचिव, लेखा सुपरिवेक्षण समितिका संयोजक, व्यवस्थापक तथा व्यवस्थापन तहका कर्मचारीहरूको सहभागिता रहेको थियो।