नवलपरासी — नवलपरासी बर्दघाट सुस्ता पश्चिममा सञ्चालन हुँदै आएको बुद्ध बचत तथा ऋण सहकारी संस्था लिमिटेड हालै नेपाल बचत तथा ऋण केन्द्रीय सहकारी संघ लि.(नेफ्स्कून) ले सञ्चालनमा ल्याएको नियमित निरिक्षण तथा अनुगमन कार्यक्रम (स्क्यान) मा औपचारिक रूपमा पौष १८ गते आवद्ध भएको छ । 

सहकारी क्षेत्रलाई पारदर्शी, सुरक्षित र दिगो बनाउन मद्दत गर्ने उद्देश्यले यो कदम महत्वपूर्ण मानिएको छ । सहकारीका अध्यक्ष युबलाल बुढाथोकीका अनुसार स्क्यान कार्यक्रममा आवद्धतालेले संस्थाको दैनिक वित्तीय कारोबारलाई अझ व्यवस्थित, डिजिटल तथा दिगो बनाउन सहयोग गर्नेछ। यसमार्फत सदस्यहरूले आफूले गरेको बचत, निक्षेप, ऋण, किस्ता तथा अन्य कारोबारको विवरण सजिलै अनुगमन गर्न सक्नेछन् ।

सहकारीमा डिजिटल सेवा विस्तार, सूचना प्रवाहको पारदर्शिता, सदस्यको पहुँच वृद्धि तथा नियमनकारी निकायहरूसँग समन्वय मजबुत हुने भन्दै संस्थाले स्क्यानमा आवद्धता भविष्यमा सहकारीका लागि महत्वपूर्ण मोडेल बन्ने विश्वास व्यक्त गरेको छ ।