दोलखा। नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको जोखिम न्यूनीकरण, सुशासन तथा दिगोपना अभिवृद्धि गर्ने उद्देश्यले सञ्चालन गरेको स्क्यान कार्यक्रम अन्तर्गत प्रगति बचत तथा ऋण सहकारी संस्था लिमिटेड, भीमेश्वर नगरपालिका–२, राम्पा, दोलखामा पौष १७ गते स्थलगत सुपरिवेक्षण कार्यक्रम सम्पन्न भएको छ।

सुपरिवेक्षण कार्यक्रमको उद्देश्य संस्थाको स्तरीकरण तथा सञ्चालन प्रक्रियालाई थप व्यवस्थित र प्रभावकारी बनाउनु रहेको थियो। सो क्रममा नेफ्स्कूनका कार्यक्रम अधिकृत राजन सुबेदी ले नेफ्स्कून एमआइएस, कार्यालय व्यवस्थापन, सम्पत्ति–दायित्व व्यवस्थापन, साधारण सभा व्यवस्थापन तथा प्राधिकरणमा दर्तासम्बन्धी विषयमा विस्तृत छलफल गर्नुभएको थियो।

सुपरिवेक्षणका क्रममा सुबेदीले संस्थालाई थप सुरक्षित, पारदर्शी तथा सदस्य–मैत्री बनाउन आवश्यक सुधारका उपायहरू सुझाव दिनुभएको थियो। संस्थाका तर्फबाट ती सुझावहरूलाई क्रमशः कार्यान्वयन गर्दै जाने प्रतिबद्धता व्यक्त गरिएको छ।