काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) ले सहकारी संस्थाहरूका लागि सञ्चालन गर्दै आएको नियमित निरीक्षण तथा अनुगमन (स्क्यान) कार्यक्रममा काठमाडौंको कीर्तिपुर नगरपालिका–३ मा रहेको किपु बचत तथा ऋण सहकारी संस्था लि. पौष २२ गते औपचारिक रूपमा आबद्ध भएको छ।

नेफ्स्कूनको स्क्यान कार्यक्रमले संस्थामा सृजना हुन सक्ने वित्तीय, कानुनी, सञ्चालन तथा सुशासन, ऋण, तरलता र बजार जोखिम न्यूनीकरणमा महत्वपूर्ण योगदान पुर्‍याउने विश्वास संस्थाका अध्यक्ष बालकृष्ण महर्जनले व्यक्त गर्नुभयो। उहाँका अनुसार स्क्यान कार्यक्रममा आबद्ध भएसँगै नियमित निरीक्षण तथा अनुगमनबाट संस्थाको उचाइ र विश्वसनीयता अझ वृद्धि हुने अपेक्षा रहेको छ।

संस्थाका व्यवस्थापक राजेन्द्र महर्जनले स्क्यान कार्यक्रम मार्फत संस्था थप सुरक्षित, संस्थागत रूपमा सुदृढ तथा संरक्षणमुखी बन्ने बताउनुभयो। साथै, सदस्यहरूको वित्तीय सुरक्षालाई प्राथमिकतामा राख्दै यस कार्यक्रमबाट जोखिम न्यूनीकरण गरी संस्था अझ सक्षम र सशक्त बनाइने प्रतिबद्धता व्यक्त गर्नुभएको छ।