लमजुङ । नेपाल बचत तथा ऋण केन्द्रीय सहकारी संघ लि. (नेफ्स्कून) लमजुङ सदस्य सेवा केन्द्रको आयोजनामा राष्ट्रिय सहकारी नियमन प्राधिकरणसम्बन्धी दर्ता तथा अभिलेखीकरण तालिम पौष २४ गते लमजुङमा सम्पन्न भएको छ।

राष्ट्रिय सहकारी नियमन प्राधिकरणद्वारा जारी गरिएको सहकारी संस्था दर्ता तथा अभिलेखीकरणसम्बन्धी व्यवस्थाबारे संघमा आबद्ध सदस्य संघ/संस्थाहरूलाई सुसूचित गराउने तथा दर्ता–अभिलेखीकरण प्रक्रियामा सहजीकरण गर्ने उद्देश्यले उक्त तालिम सञ्चालन गरिएको हो। कार्यक्रममा लमजुङ जिल्लाका विभिन्न सहकारी संस्थाबाट ५० भन्दा बढी प्रतिनिधिहरूको सहभागिता रहेको थियो।

तालिमको सहजीकरण नेफ्स्कून सदस्य सेवा पोखराका प्रमुख सुरज चालिसेले गर्नुभएको थियो। उहाँले दर्ता प्रक्रियाको महत्व, आवश्यक कागजात, अभिलेखीकरण गर्दा ध्यान दिनुपर्ने विषयहरू तथा नियामकीय प्रावधानहरूबारे स्पष्ट पार्नुभएको थियो। कार्यक्रमको व्यवस्थापन नेफ्स्कून लमजुङ सदस्य सेवा केन्द्रका प्रमुख सन्देश घिमिरेले गर्नुभएको थियो।

तालिमका क्रममा सहभागीहरूलाई राष्ट्रिय सहकारी नियमन प्राधिकरणको दर्ता पोर्टल प्रयोग विधि, सञ्चालकको स्थायी लेखा नम्बर निकाल्ने प्रक्रिया, दर्ता तथा अभिलेखीकरणका चरणहरू लगायतका प्राविधिक विषयहरूमा व्यवहारिक रूपमा सहजीकरण गरिएको थियो।

कार्यक्रमले सहकारी संस्थाहरूलाई नियमनको दायराभित्र ल्याउन सहयोग पुर्‍याउनुका साथै सहकारी क्षेत्रलाई थप सुदृढ र व्यवस्थित बनाउन महत्वपूर्ण योगदान पुर्‍याउने अपेक्षा गरिएको छ। तालिम सहकारी संस्थाहरूको दैनिक सञ्चालनका लागि अत्यन्त उपयोगी रहेको भन्दै सहभागीहरूले सकारात्मक प्रतिक्रिया व्यक्त गरेका छन्।