काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को केन्द्रीय कार्यालयको आयोजनामा “राष्ट्रिय सहकारी नियमन प्राधिकरणमा दर्ता अभिलेखीकरण सम्बन्धी एक दिवसीय अभिमुखीकरण तालिम ” माघ ७ गते संघको केन्द्रीय कार्यालयमा सम्पन्न भएको छ ।

केन्द्रीय कार्यालय अन्तर्गत कारोबार गर्ने बचत तथा ऋण सहकारी संस्थाका अध्यक्ष, सञ्चालक समिति सदस्य, लेखा सुपरिवेक्षण समिति सदस्य, व्यवस्थापक तथा प्रमुख जिम्मेवारीमा रहेका कर्मचारीहरूलाई लक्षित गरी तालिम आयोजना गरिएको नेफ्स्कूनका प्राचार्य बल्लभ तिमल्सिनाले जानकारी दिनुभयो ।

संशोधित सहकारी ऐन, नियमकीय निर्देशन, राष्ट्रिय सहकारी नियमन प्राधिकरणमा दर्ता तथा अभिलेखीकरण प्रक्रिया, नियामक मापदण्ड र तिनको कार्यान्वयनसम्बन्धी विषयमा स्पष्ट जानकारी प्रदान गर्दै सहभागीहरूको क्षमता विकास गर्ने उद्देश्यले तालिम सञ्चालन गरिएको बताउनुभयो ।

तालिममा नेफ्स्कूनका व्यवसाय अधिकृत विदुर खड्काले संशोधित सहकारी ऐनका नयाँ व्यवस्था र त्यसको प्रभाव, राष्ट्रिय सहकारी नियमन प्राधिकरणमा दर्ता तथा अभिलेखीकरणसम्बन्धी प्रावधान, नियामक निर्देशन र मापदण्ड, जोखिम–भारित सम्पत्ति गणना विधि, पूँजीकोष तथा पूँजीकोष पर्याप्तता अनुपात गणना गर्ने तरिका लगायतका विषयमा सहजीकरण गर्नुभएको थियो ।

कार्यक्रममा २० भन्दा बढी बचत ऋण सहकारी संस्थाका अध्यक्ष, सञ्चालक, लेखा सुपरिवेक्षण समिति सदस्य, व्यवस्थापक तथा प्रमुख जिम्मेवारीमा रहेका कर्मचारीहरूको सहभागिता रहेको थियो ।