पोखरा । नेपाल बचत तथा ऋण केन्द्रीय सहकारी संघ लि. (नेफ्स्कून) पोखरा सदस्य सेवा कार्यालयको प्राविधिक सहयोग तथा स्याङ्जा जिल्ला सहकारी संघ व्यवस्थापन उप समिति को आयोजनामा, स्याङ्जा सहकारी संघ र स्याङ्जा बचत सहकारी संघ लि. को समन्वयमा  राष्ट्रिय सहकारी नियमन प्राधिकरणमा दर्ता, अभिलेखीकरण सम्बन्धी एक दिवसीय अभिमुखीकरण कार्यक्रम माघ ०८ गते सम्पन्न भएको छ । 

स्याङ्जा जिल्ला सहकारी संघ व्यवस्थापन उप समिति सदस्य शिव वाग्लेको अध्यक्षता, स्याङ्जा बचत ऋण सहकारी संघ लि. का अध्यक्ष लक्ष्मीपति पौडेलको प्रमुख आतिथ्यता तथा सहकारी म्यानेजर्श क्लब कास्कीका अध्यक्ष मोहन प्रसाद अधिकारी को आतिथ्यतामा सञ्चालित कार्यक्रममा स्याङ्जा जिल्लाका सहकारी संस्थाबाट ७५ भन्दा बढी अध्यक्ष, सञ्चालक, लेखा सुपरिवेक्षण समितिका सदस्य, व्यवस्थापक तथा प्रमुख जिम्मेवारीमा रहेका कर्मचारीहरूको सहभागिता रहेको थियो ।

नेफ्स्कून पोखरा सदस्य सेवा कार्यालयका ईन्चार्ज सुरज चालिसेले संशोधित सहकारी ऐनका नयाँ व्यवस्था र त्यसको असर, राष्ट्रिय सहकारी नियमन प्राधिकरणमा दर्ता तथा अभिलेखीकरण सम्बन्धी प्रावधान, नियामक निर्देशन र मापदण्ड, जोखिम–भारित सम्पत्ति गणना गर्ने तरिका, पूँजीकोष तथा पूँजीकोष प्रर्याप्तता अनुपात गणना विधि लगायतका विषयमा सहजीकरण गर्नुभएको थियो । कार्यक्रमबाट सहकारी संस्थाहरूलाई नियमनको दायराभित्र ल्याउन तथा सहकारी क्षेत्रलाई सुदृढ बनाउन महत्वपूर्ण योगदान पु¥याउने अपेक्षा गरिएको छ । 

साथै यसै कार्यक्रममा संघले यस आर्थिक वर्षदेखि सञ्चालनमा ल्याएको नियमित निरीक्षण तथा अनुगमन (स्क्यान) कार्यक्रमको अभिमुखीकरण समेत संघका कार्यक्रम अधिकृत मनोज खड्का ले गर्नु भएको थियो । सहकारी संस्थालाई थप व्यवस्थित बनाउन नियमनकारी निकायबाट जारी गरिएका निर्देशिकाअनुसार साकोसले पालना गर्नुपर्ने नीति तथा नियमको अवस्थाको विश्लेषण गर्न नेफ्स्कूनले नियमित सुपरिवेक्षण, वित्तीय सूचकाङ्क मूल्यांकन तथा आन्तरिक नियन्त्रण परीक्षणलाई स्क्यानका सूचकका आधारमा निरन्तर अनुगमन गर्ने जानकारी दिनुभएको थियो ।