ललितपुर । राष्ट्रिय सहकारी महासंघ लि। नेपालको आयोजना तथा भूमि व्यवस्था, सहकारी तथा गरिबी निवारण मन्त्रालयको सहकार्यमा दोस्रो राष्ट्रिय सहकारी युवा तथा प्रविधि सम्मेलन २०८२ माघ १४ गते ललितपुरमा सम्पन्न भएको छ।

२०८२ साल माघ १३ र १४ गते आयोजित सम्मेलनमा देशभरका युवा सहकारीकर्मी, प्रविधि विज्ञ, नीति निर्माता, सरकारी, निजी, गैरसरकारी क्षेत्र तथा सरोकारवालाहरूको सहभागिता रहेको थियो। सम्मेलनमा सहकारी अभियानलाई आधुनिक, प्रविधिमैत्री र युवाकेन्द्रित बनाउने विषयमा गहन छलफल गरिएको थियो। 

सम्मेलनले सहकारी क्षेत्रको रूपान्तरणका लागि युवा नेतृत्व र प्रविधिको समन्वय अपरिहार्य रहेको निष्कर्ष निकाल्दै विभिन्न महत्वपूर्ण संकल्पहरू जारी गरेको छ। सहकारीलाई पारदर्शी, दिगो र सदस्य–मैत्री बनाउन डिजिटल भुक्तानी प्रणाली, डेटा व्यवस्थापन, फिनटेक तथा एग्रिटेकजस्ता आधुनिक प्रविधिको पूर्ण अवलम्बन गर्न जोड दिइएको छ।

युवामैत्री नीति, प्रविधि प्रयोगमैत्री कानुन तथा नवप्रवर्तनलाई प्रोत्साहन गर्ने वातावरण निर्माणका लागि सरकार, नियामक निकाय र सहकारी अभियानबीच प्रभावकारी समन्वय आवश्यक रहेको सम्मेलनले औंल्याएको छ। साथै, युवालाई प्रविधि र उद्यमशीलतामा दक्ष बनाउन तालिम, मेन्टरशिप, अनुसन्धान तथा नवप्रवर्तन केन्द्र स्थापना र विस्तारमा जोड दिइने उल्लेख गरिएको छ।

सम्मेलनले सहकारीमार्फत युवाको स्वरोजगार सिर्जना, स्टार्टअप व्यवसायमा आकर्षण बढाउने, वित्तीय लगानी, प्राविधिक शिक्षा तथा व्यवसायिक सहयोग प्रणाली विकास गर्न सहकारी संस्थाहरूलाई आग्रह गरेको छ। उद्यमशील युवालाई प्रोत्साहन गर्दै उत्पादनको बजारीकरणका लागि सहकारी नेटवर्कमार्फत एकीकृत ब्रान्डिङ र साझा बजार केन्द्र निर्माण गर्ने विषयमा पनि प्रतिबद्धता व्यक्त गरिएको छ।

महासंघले ६ बुँदे घोषणा जारी गर्दै सम्मेलन सम्पन्न भएको थियो ।