दाङ । सहयोगी बचत तथा ऋण सहकारी संस्था लि. तुलसीपुर, दाङको आयोजनामा रणनीतिक व्यवसायिक योजना निर्माण कार्यशाला माघ १७ गते सम्पन्न भएको छ ।

तीन दिनसम्म सञ्चालन भएको कार्यशाला माघ १५ देखि १७ गतेसम्म लुम्बिनी सांस्कृतिक नगरपालिका, लुम्बिनीमा सञ्चालन भएको हो । कार्यशालामा सञ्चालक समिति, लेखा सुपरिवेक्षण समिति, सल्लाहकार, उप–समिति तथा व्यवस्थापन तह गरी जम्मा २३ जनाको सहभागिता रहेको थियो ।

नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहयोग तथा साकोसको आयोजनामा सञ्चालित कार्यशालामा संघका बरिष्ठ अधिकृत कोमल राज अधिकारी र कार्यक्रम अधिकृत प्रविण अधिकारीले सहजिकरण गर्नुभएको थियो । 

कार्यक्रमको अध्यक्षता साकोसका अध्यक्ष डिलाराम विष्टले गर्नुभएको थियो । कार्यक्रम सञ्चालन संस्थाका सचिव दुर्गा प्रसाद शर्माले गर्नुभएको थियो भने स्वागत मन्तव्य लाल बहादुर के.सी.ले राख्नुभएको थियो ।

कार्यशालाको क्रममा नेफ्स्कूनका अध्यक्ष चन्द्र प्रसाद ढकालले साकोसमा सदस्यको विश्वास जित्न र संस्थाप्रति अपनत्व बढाउन संस्थाको नेतृत्वले सदस्य तथा संस्थाको हितमा हुने कार्यक्रम, योजना र निर्णय लिनुपर्नेमा जोड दिनुभयो । व्यक्तिको दीर्घजीवनका लागि स्वास्थ्य जाँच आवश्यक भएझैँ संस्थाको दिगोपनाका लागि पनि नियमित रूपमा संस्थागत स्वास्थ्य परीक्षण आवश्यक हुने बताउनुभयो । जोखिम न्यूनीकरण गर्दै संस्था सञ्चालन गर्दा दीर्घकालीन रूपमा कम क्षति हुने उल्लेख सहित साकोसहरूले नेफ्स्कूनद्वारा सञ्चालनमा ल्याएको नियमित निरीक्षण तथा अनुगमन (स्क्यान) कार्यक्रममा आवद्ध भई परीक्षण गर्नुपर्नेमा जोड दिनुभएको थियो ।

लुम्बिनी सांस्कृतिक नगरपालिकाका कार्यवाहक मेयर कल्पना हरिजनले सहकारी संस्था सञ्चालन गर्दा आर्थिक पारदर्शिता र सदस्यहरूको विश्वास जित्नु अत्यन्त आवश्यक रहेको बताउनुभयो । ऋणको सही सदुपयोग नहुँदा सदस्य र सहकारी दुवैमा समस्या आउने भएकाले गुणस्तरीय ऋण लगानी, ऋण सदुपयोगिताको अनुगमन तथा सदस्यहरूलाई ऋण सदुपयोग सम्बन्धी शिक्षा प्रदान गर्नुपर्नेमा विशेष जोड दिनुभयो ।

कार्यशालाबाट सहयोगी साकोसको आगामी रणनीतिक व्यवसायिक दिशा स्पष्ट हुनुका साथै संस्थालाई दिगो र सदस्य–केन्द्रित बनाउने विषयमा साझा समझदारी विकास भएको आयोजकले जनाएका छन् ।