काठमाडौं । आगामी ६९औँ राष्ट्रिय सहकारी दिवसका लागि “उद्यमशीलता र पारदर्शिताः सहकारीको प्राथमिकता” भन्ने थिम सार्वजनिक भएको छ । 

सहकारी क्षेत्रलाई उत्पादनमुखी, उत्तरदायी र विश्वासिलो बनाउने लक्ष्यसहित शनिबार महासंघका का.बा.अध्यक्ष रमेशप्रसाद पोखरेलको अध्यक्षतामा बसेको २२८औँ बोर्ड बैठकले ’उद्यमशीलता र पारदर्शिताः सहकारीको प्राथमिकता भन्ने मूल थिम तय गरेको हो ।

पछिल्ला वर्षहरूमा देखिएका वित्तीय अनियमितता र कमजोर सुशासनका घटनाले सहकारी क्षेत्रको विश्वसनीयतामा प्रश्न उठाएको छ । यस्तो अवस्थामा पारदर्शिता केवल घोषणाको विषय नभई संस्थागत सुधारको अनिवार्य आधार बन्नुपर्ने सरोकारवालाहरूको धारणा छ ।

विज्ञहरूका अनुसार सहकारीको उद्यमशीलता सदस्यको उत्पादन, रोजगारी र बजार विस्तारसँग जोडिनुपर्ने भए पनि व्यवहारमा सदस्य–केन्द्रित कार्यक्रमभन्दा वित्तीय कारोबार विस्तारमै बढी ध्यान केन्द्रित भएको देखिन्छ ।

यस पृष्ठभूमिमा सहकारी दिवसको थिमलाई सार्थक बनाउन स्पष्ट कार्ययोजना, मापनयोग्य लक्ष्य र बलियो स्व–नियमन प्रणाली अपरिहार्य रहेको सरोकारवालाहरूले औँल्याएका छन् ।

वि.सं. २०१३ साल चैत्र २० गते नेपालमा सहकारी अभियानको औपचारिक थालनी भएको ऐतिहासिक दिनको स्मरण गर्दै प्रत्येक वर्ष चैत्र २० गते ‘राष्ट्रिय सहकारी दिवस’ मनाउने गरिन्छ ।