सुर्खेत, कर्णाली प्रदेश — कर्णाली प्रदेशमा सहकारी क्षेत्रका समसामयिक विषयहरूमा केन्द्रित उच्चस्तरीय छलफल चैत्र २५ गते सम्पन्न भएको छ । प्रदेशका मुख्यमन्त्री यमलाल कंडेल र नेफ्स्कूनका महासचिव घनश्याम अधिकारीबीच  मुख्यमन्त्री निवासमा भएको भेटमा सहकारी क्षेत्रको सुधार, अनुगमन र व्यवस्थापनका विषयमा विचार विमर्श गरिएको हो ।

छलफलमा कर्णाली प्रदेश अन्तर्गत सञ्चालन भइरहेको नियमित निरीक्षण तथा अनुगमन (स्क्यान) कार्यक्रममा आबद्ध बचत तथा ऋण सहकारी संस्थाहरूलाई लाग्ने खर्च व्यवस्थापनका लागि प्रदेश सरकारबाट निश्चित प्रतिशत योगदान गर्ने विषयमा छलफल भएको थियो ।

त्यसैगरी, सहकारी संस्थाहरूलाई सुशासनमा ल्याउने उद्देश्यले प्राविधिक तालिम सञ्चालन गर्न प्रदेश सरकारसंगको समन्वयमा गर्नका लागि समेत छलफल भएको थियो । 

यस अवसरमा नेफ्स्कून टोलीले विभिन्न बचत तथा ऋण सहकारी संस्थाहरूसँग संस्थागत भेटघाट तथा छलफल गरेको थियो । वीरेन्द्रनगर साकोसका अध्यक्ष तथा व्यवस्थापन प्रमुखहरूसँगको भेटमा संस्थागत गतिविधिबारे जानकारी लिँदै वर्तमान चुनौतीहरूका समाधानका लागि आवश्यक सुझावहरू आदानप्रदान गरिएको थियो । सुर्खेत सदस्य सेवा कार्यालयका व्यवस्थापन उपसमिति सदस्यहरु र कर्मचारीबीच सेवा कार्यालयको उन्नति तथा प्रभावकारी सञ्चालनका लागि मार्गदर्शन प्रदान गरिएको थियो ।