इटहरी — इटहरी स्थित किसान कल्याण बचत तथा ऋण सहकारी संस्था लिमिटेड ले मातातीर्थ औँसीको अवसरमा ३९ जना ज्येष्ठ आमाहरूलाई सम्मान गरेको छ ।

संस्थाका अध्यक्ष शालिकराम ढकालको अध्यक्षतामा इटहरी–१६ स्थित साकोसको सभाहलमा आयोजित कार्यक्रममा ज्येष्ठ आमाहरूलाई वैशाख ०३ गते सम्मान गरेको हो । 

कार्यक्रममा साकोसका सल्लाहकार, सञ्चालक समिति, लेखा सुपरिवेक्षण समिति, विभिन्न उपसमिति तथा उच्च व्यवस्थापनका कर्मचारीहरुको उपस्थिति रहेको थियो ।

सम्मानित आमाहरूलाई सम्मानपत्र, फलफूल तथा नगद प्रदान गरिएको साकोसका अध्यक्ष शालिकराम ढकालले बताउनुभयो । ७० वर्ष उमेर पूरा गरेका ज्येष्ठ शेयर सदस्य तथा शेयर सदस्यको एकाघरमा बसोबास गर्ने आमाहरूलाई प्रत्येक वर्ष यसरी नै साकोसले सम्मान गर्दै आएको छ ।

सामाजिक तथा सामुदायिक उत्तरदायित्व अन्तर्गत साकोसले हरेक वर्ष मातातीर्थ औँसीका अवसरमा ज्येष्ठ आमाहरूलाई सम्मान गर्ने कार्यक्रम सञ्चालन गर्दै आएको छ,  सम्मान तथा समुदायमा आधारीत थुप्रै कार्यक्रमहरु साकोसले सञ्चालन गर्दै आएको छ ।