पोखरा । पोखरा १०, बुद्धचोक कास्कि स्थित पोखरा रोयल बचत तथा ऋण सहकारी संस्था लिमिटेडले महिलाहरुलाई व्यावसायिक शीप सिकाउने उद्धेश्य अनुसार १५ दिने पाककला (कुकिङ्ग) तालिम सञ्चालन गरेको छ । 

साकोसले वार्षिक कार्यक्रम बमोजिम कुकिङ्ग शिक्षाको पहिलो ब्याच अन्तर्गत ११ जना महिला सदस्यहरुको लागि तालिम रोयल दिदीबहिनी किचनको तालिम हलमा सञ्चालन गरेको हो । 

तालिम शुभारम्भ गर्दै संस्थाका अध्यक्ष रुद्रकुमारी गुरुङ्ग (मैना) ले तालिमले दक्ष जनशक्ति उत्पादन गर्नुका साथै महिलाहरुलाई रोयल किचनमा नै रोजगारीको अवसर प्रदान गर्ने गरि व्यवस्थापन हुने प्रतिवद्धता व्यक्त गर्नुभयो । रोयल दिदीबहिनी किचन सहकारीका ९९ जना महिला सदस्यहरुद्धारा सञ्चालन गरिएको कम्पनी हो । 

सहकारीले महिलाहरुलाई व्यावसायिक बनाउने उद्धेश्य बमोजिम यस भन्दा अगाडि अचार बनाउने तालिम, मौरी पालन तालिम र तरकारी उत्पादन र बजारीकरण शीप सम्वन्धी तालिम प्रदान गरिसकेको संस्थाका प्रमुख कार्यकारी अधिृकृत भीम गुरुङ्गले बताउनुभयो । 

आगामी वर्ष साकोसले २५ जना महिलाहरुलाई व्यावसायिक तालिम दिने लक्ष्य राखेको छ । साकोसले सदस्यहरुद्धारा उत्पादित सामग्रीहरुको विक्री तथा प्रदर्शनीको लागि सहकारी कोसेली घर समेत सञ्चालन गरिरहेको छ । 

जेठ ०१ गतेबाट सञ्चालन भएको तालिममा सहभागीहरुले रेष्टुरेन्टको मेनुमा हुने धेरै प्रकारका खानेकुराहरु बनाउन सिक्नेछन् । 

तालिम शुभारम्भ कार्यक्रममा संस्थाका उपाध्यक्ष क्या.चन्द्रप्रसाद गुरुङ्ग, सञ्चालक द्धय खिमकुमारी गुरुङ्ग र हिरालाल श्रेष्ठ, उपसमितिका सदस्यहरु साथै व्यवस्थापनको सहभागिता रहेको थियो ।