काठमाडौं । थानकोट स्थित थानकोट महिला बचत तथा ऋण सहकारी संस्था लि. मा नेफ्स्कूनद्वारा सञ्चालित नियमित निरीक्षण तथा अनुगमन (स्क्यान) कार्यक्रम अन्तर्गतको स्थलगत सुपरिवेक्षण जेठ १२ गते सम्पन्न भएको छ ।

सहकारी क्षेत्रमा सुशासन, दिगोपन र वित्तीय अनुशासन प्रवद्र्धन गर्ने उद्देश्यका साथ नेफ्स्कूनले यस नियमित स्थलगत सुपरिवेक्षण कार्यलाई निरन्तरता दिएको हो । सहकारीहरूलाई राज्य तथा नियामक निकायसँग समन्वय गराउँदै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु यस सुपरिवेक्षणको मुख्य उद्देश्य रहेको छ ।

निरीक्षणका क्रममा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण, सम्पत्ति शुद्धिकरण निवारण नीति (AML/CFT) र भाखा नाघेका ऋण असुलीका विषयहरूमा केन्द्रित रही समग्र अवस्थाको मूल्यांकन गरिएको थियो ।

नेफ्स्कूनका कार्यक्रम अधिकृत सोविता मैनालीद्वारा गरिएको उक्त सुपरिवेक्षण कार्यक्रममा साकोसका अध्यक्ष सपना महर्जन, व्यवस्थापक बिपना महर्जन तथा सञ्चालक सदस्यहरूको उपस्थिति रहेको थियो ।