प्यूठान । नेपाल बचत तथा ऋण केन्द्रीय सहकारी संघ लि. (नेफ्स्कून) द्वारा सञ्चालित स्क्यान कार्यक्रम अन्तर्गत जुम्री बाँहाजोरी बचत तथा ऋण सहकारी संस्था लि. प्यूठानमा असार २३ गते स्थलगत सुपरीवेक्षण सम्पन्न भएको छ । 

संस्थाको सञ्चालक समिति तथा व्यवस्थापनको सहभागितामा सम्पन्न सुपरीवेक्षणमा संस्थाको सुशासन, जोखिम व्यवस्थापन प्रणाली, वित्तीय अवस्था, आन्तरिक नियन्त्रण प्रणाली, बचत तथा ऋण व्यवस्थापन, अभिलेख तथा दस्तावेज व्यवस्थापन, नीतिगत व्यवस्था तथा स्क्यान कार्यक्रमका विभिन्न सूचकहरूको कार्यान्वयन अवस्थाको विस्तृत समीक्षा गरिएको थियो ।

सुपरीवेक्षणका क्रममा संस्थाका सबल पक्षहरूको पहिचान गर्दै थप सुदृढीकरण गर्नुपर्ने क्षेत्रहरूबारे आवश्यक सुझाव तथा प्राविधिक परामर्श प्रदान गरिएको थियो । साथै, संस्थागत सुशासन अभिवृद्धि, प्रभावकारी जोखिम व्यवस्थापन, आन्तरिक नियन्त्रण प्रणालीको सुदृढीकरण तथा सदस्यमुखी सेवाको गुणस्तर वृद्धि गर्न सुधारात्मक कार्ययोजना तयार गरी प्रभावकारी रूपमा कार्यान्वयन गर्न जोड दिइएको थियो । 

स्थलगत सुपरीवेक्षण नेफ्स्कून कार्यक्रम अधिकृत प्रबिण अधिकारीले सहजीकरण गर्नुभएको थियो । सुपरीवेक्षणबाट प्राप्त सुझावहरूलाई कार्यान्वयन गर्दै संस्थालाई थप पारदर्शी, उत्तरदायी तथा सदस्यकेन्द्रित बनाउने प्रतिबद्धता संस्थाका सञ्चालक समिति तथा व्यवस्थापनले व्यक्त गरेका छन् । 

नेफ्स्कूनद्वारा सञ्चालन हुँदै आएको स्क्यान कार्यक्रमले सदस्य संस्थाहरूमा सुशासन प्रर्बद्धन, जोखिम न्यूनीकरण, वित्तीय अनुशासन तथा संस्थागत क्षमता अभिवृद्धिमा महत्वपूर्ण योगदान पु¥याउँदै आएको छ ।